नवी दिल्लीः वक्फ मंडळ सुधारणा विधेयकाची छाननी करण्यासाठी नेमण्यात आलेल्या संयुक्त संसदीय समितीच्या (जेपीसी) आजच्या बैठकीमध्ये प्रचंड गदारोळ झाला. तब्बल नऊ तास चाललेल्या आणि एकाच वकिलाने ‘जेपीसी’समोर दोन वक्फ मंडळांची बाजू मांडण्याला अध्यक्ष जगदंबिका पाल यांनी कडाडून विरोध दर्शविला. यामुळे संतप्त झालेल्या विरोधी पक्षांनी सभात्यागाचे अस्त्र उपसल्याने आजची बैठक वादळी ठरली. भाजपचे खासदार जगदंबिका पाल हे संयुक्त संसदीय समितीचे अध्यक्ष असून या समितीत लोकसभा आणि राज्यसभेच्या खासदारांचा समावेश आहे.

वक्फ मंडळाचे प्रशासकीय अधिकार जिल्हाधिकाऱ्यांना देणाऱ्या तसेच वक्फ मंडळावर बिगर मुस्लिम सदस्यांच्या नेमणुकीची मुभा देणाऱ्या तरतुदींवरून दुरुस्ती विधेयकाला विरोधी पक्षांकडून जोरदार विरोध केला जात आहे. त्यापार्श्वभूमीवर ‘जेपीसी’च्या आजच्या बैठकीमध्येही पुन्हा एकदा विरोधकांकडून हा मुद्दा लावून धरण्यात आला.

वक्फ मंडळांना न्यायालयीन अधिकार देणारी कायदेशीर तरतूद नव्या विधेयकातून हटविण्यावरूनही विरोधकांनी जोरदार आक्षेप घेतला. केंद्र सरकारने आणलेल्या दुरुस्ती विधेयकावर बाजू मांडण्यासाठी आज समितीसमोर मुंबईतील ‘ऑल इंडिया सुन्नी जमायतुल उलेमा’, दिल्लीतील ‘इंडियन मुस्लिम फॉर सिव्हिल राईट्स’ तसेच उत्तर प्रदेशातील ‘सुन्नी सेंट्रल वक्फ बोर्ड’ आणि राजस्थानातील ‘मुस्लिम वक्फ बोर्ड’ या संघटनांना बोलाविण्यात आले होते.

यामध्ये मुंबईतील संघटनेची बाजू मांडणाऱ्या वकिलांनीच पुन्हा राजस्थानातील वक्फ बोर्डाची बाजू मांडण्यासाठी हजेरी लावल्याने ‘जेपीसी’चे अध्यक्ष जगदंबिका पाल भडकले आणि त्यांनी या वकिलांना बाहेर जाण्याचे आदेश दिले. एकच वकील दोन वेगवेगळ्या संघटनांचे प्रतिनिधित्व करताना वेगळे मुद्देही उपस्थित करू शकतो असा युक्तिवाद विरोधी पक्षांच्या खासदारांचा होता. यावरून जोरदार खडाजंगी होऊन कॉंग्रेसचे नासिर हुसेन, ‘एमआयएम’चे असदुद्दीन ओवेसी, ‘आप’चे संजयसिंह, ‘द्रमुक’चे ए. राजा, शिवसेना- उद्धव बाळासाहेब ठाकरे पक्षाचे अरविंद सावंत, तृणमूल कॉंग्रेसचे नईमुल हक आणि अन्य विरोधी खासदारांनी सभात्याग केला.

मलंगगडावरील ताबा सोडाः शिवसेना
सत्ताधारी आणि विरोधी पक्षांच्या खासदारांमध्ये जोरदार जुंपली होती. या बैठकीत एमआयएमचे खासदार ओवेसी आणि भाजपच्या खासदार मेधा कुलकर्णी यांच्यात शाब्दिक चकमक झाली. तत्पूर्वी, भाजप खासदार दिलीप सैकिया आणि आपचे खासदार संजय सिंह यांच्यातही जुंपली होती. दरम्यान, वक्फ मंडळांवर बिगर मुस्लिम सदस्य नको हा विरोधकांचा आक्षेप खोडून काढताना शिवसेनेचे खासदार नरेश म्हस्के यांनी कल्याण जवळच्या मलंगगडावर हिंदूपद्धतीने पूजाअर्चा होत असताना मुस्लिम समुदाय तेथील हक्क का सोडत नाही? असा सवाल केल्याचे सूत्रांनी सांगितले. समितीची पुढील बैठक ५ आणि ६ सप्टेंबरला होणार आहे. दर आठवड्याला बैठक व्हावी असा अध्यक्ष जगदंबिका पाल यांचा आग्रह आहे.