West Bengal Assembly Election 2021 : पश्चिम बंगालमध्ये विधानसभा निवडणुकीच्या प्रचारानं चांगलाच वेग घेतला आहे. प्रचार सभांदरम्यान दररोज खळबळजनक आणि वादग्रस्त वक्तव्ये केली जात आहेत. त्यातच आज केंद्रीय गृहमंत्री अमित शाह यांनी झारग्राम येथे प्रचारादरम्यान ममता दीदींना टार्गेट केलं. ते म्हणाले, जोपर्यंत दीदी सत्तेत आहेत तोपर्यंत मलेरिया-डेंग्यू संपणार नाही. दीदींची मलेरिया आणि डेंग्यूशी मैत्री आहे. तुम्ही दीदींना हटवा त्यानंतर कमळाच्या फुलाचं सरकार अर्थात भाजप दीड वर्षात मलेरिया संपवून टाकेल. 

शहा म्हणाले, "दीदी तुम्ही आम्हाला काय घाबरवत आहात. 'खेला होबे'नं आम्ही घाबरुन जाऊ असं तुम्हाला वाटतंय का? दीदींना माहिती आहे, बंगालमधील छोटं मुलंही फुटबॉल खेळतं, आपल्या 'खेला होबे'ला कोणीही घाबरत नाही." 

देशात लसीकरणात महाराष्ट्र आघाडीवर; पाच दशलक्ष डोसचा टप्पा गाठणारं पहिलं राज्य

झारग्राम हिरवीगार जंगलं आणि लाल मातीची भूमी आहे. आदिवासी बांधवांनी अनेक वर्षांपासून या भूमीची संस्कृती टिकवून ठेवली आहे. माती आणि भूमिपुत्रांची घोषणा देत दीदी सत्तेत आल्या मात्र त्यांनी तुमच्यासाठी काहीही केलं नाही. आपण जंगलातून वनसंपत्ती गोळा करुन आणता त्याचा तुम्हाला चांगला मोबदला मिळत नाही. त्यामुळे आम्ही हे निश्चित केलंय की, आम्ही ४९ वन संपत्तींना किमान आधारभूत किंमत देऊन चांगला मोबदला मिळवून देण्यास सुरुवात करु, असंही यावेळी शहा म्हणाले.  

ऑनलाईन दाखले, मुलांचा शिक्षणाचा खर्च आणि पाच रुपयांत जेवण

पश्चिम बंगालमध्ये आदिवासींना एखादा दाखला हवा असला तर त्यांना तलाठ्याला लाच द्यावी लागते. मात्र, आम्ही हे निश्चित केलंय की, आदिवासींसाठी ऑनलाईन दाखले उपलब्ध करुन लाच संपवून टाकू. लघू आणि भूमिहीन शेतकऱ्यांच्या मुला-मुलींच्या शिक्षणाचा खर्च भाजपचं सरकार उचलणार आहे. जंगलमहल, झारग्राम आणि गरीब भागात आता ५ रुपयांत चांगलं जेवण देण्याची व्यवस्था भाजपचं सरकार करणार आहे.