देशात कोरोना महामारीच्या (Covid-19) दुसऱ्या लाटेनं हाहा:कार माजवला आहे. आरोग्य व्यवस्थेच्या बोजवाऱ्यामुळे अनेंकाचा मृत्यू झाला आहे. यातच देशातील अनेक रुग्णालयाचा बेजबादारपणाही समोर आला आहे. पश्चिम बंगालमधील एका कोविड रुग्णालयाचा बेजाबदारपणा समोर आलाय. डेथ सर्टिफिकेट (death certificate) जारी करण्यात आल्यानंतर स्मशानभूमीतील कर्मचारी मृतदेह आणायला रुग्णालयात गेले तर रुग्ण खाटेवर बसला असल्याचे आढळून आले. पश्चिम बंगालमधील (west-bengal) हिजुली येथील नेताजी सुभाष कोविड रुग्णालयात हा धक्कादायक प्रकार घडला.

हिजुली येथील एका २६ वर्षीय तरुणाला ताप आणि छातीत कळ आल्याने कुटुंबीयांनी राणाघाट रुग्णालयात दाखल केले. तेथे कोरोना संसर्गाचे निदान झाल्यामुळे त्याला कल्याणीत हलविण्यात आले. त्याच्यावर गेले चार दिवस उपचार सुरु होते. त्याचे निधन झाल्याचा संदेश शुक्रवारी रुग्णालयातील कर्मचाऱ्याने कुटुंबीयांना पाठविला. त्यांना शनिवारी मृत्युचा दाखला देण्यात आला.

स्मशानभूमीचे कर्मचारी रुग्णालयात गेल्यानंतर हा तरुण जिवंत असल्याचे स्पष्ट झाले. मृत्यूच्या प्रमाणपत्रावर त्याच्या वडीलांचे निधन झाल्याचाही उल्लेख होता, मात्र प्रत्यक्षात ते हयात आहेत. या प्रकारानंतर कुटुंबीयांनी त्या तरुणाला दुसऱ्या रुग्णालयात हलविले. याप्रकरणी कोणतीही तक्रार आलेली नाही, तसेच पूर्ण माहिती घेऊनच प्रतिक्रिया देऊ असे एका वरिष्ठ अधिकाऱ्याने स्पष्ट केले.