नवी दिल्ली : हरित फटाक्यांच्या नावाखाली काही फटाके उत्पादकांकडून बंदी घालण्यात आलेल्या कानठळ्या बसविणाऱ्या फटाक्यांची सरसकट विक्री होताना दिसते असे सांगतानाच सर्वोच्च न्यायालयाने आज याआधी आम्ही अशा फटाक्यांवर बंदी घालण्याच्या दिलेल्या आदेशांची राज्यांनी अंमलबजावणी करावी असे म्हटले आहे. न्या. एम.आर. शहा आणि न्या.ए.एस.बोपन्ना यांच्या खंडपीठाने हे निर्देश दिले. उत्सव साजरा करण्यास आमचा विरोध नाही पण त्यामुळे लोकांचा जीव धोक्यात घातला जाऊ नये, असे मतही न्यायालयाने मांडले.

न्यायालय म्हणाले की,‘‘ केवळ फटाक्यांची मोठी आतषबाजी म्हणजे उत्सव नव्हे, तुम्ही आवाज न करणाऱ्या फुलबाजीच्या माध्यमातून आनंद घेऊ शकता. आम्ही याआधी दिलेल्या आदेशांची सर्वच राज्यांनी अंमलबजावणी करावी. तुम्ही कोणत्याही राज्यात अथवा शहरामध्ये जा किंवा उत्सावात सहभागी व्हा, तिथे तुम्हाला अशा फटाक्यांची बाजारात उघडपणे विक्री होत असल्याचे दिसून येते. याबाबत आम्ही दिलेल्या आदेशांची पालन होणे गरजेचे आहे. हा एखाद्या घटकाच्या वापराचा प्रश्‍न नाही. काही बंदी घालण्यात आलेली उत्पादने सरसकट विकली जातात आणि लोकांकडून त्यांचा वापरही होतो. या उत्पादनांवर बंदी घालण्यात आली असताना देखील ती बाजारपेठेमध्ये कशी उपलब्ध होतात.’’