वाराणसी : सत्तर वर्षात जेवढे डॉक्टर्स मेडिकल कॉलेजमधून बाहेर पडले नाहीत त्यापेक्षा अधिक डॉक्टर्स पुढील १०-१२ वर्षात तयार होतील, असं पंतप्रधान नरेंद्र मोदी यांनी म्हटलं आहे. वाराणसी येथे एका जाहीर सभेला संबोधित करताना ते बोलत होते. उत्तर प्रदेशच्या आगामी विधानसभा निवडणुकीच्या पार्श्वभूमीवर पंतप्रधान नरेंद्र मोदींच्या सभांना सुरुवात झाली आहे.

मोदी म्हणाले, स्वातंत्र्यानंतर गेल्या ७० वर्षात भारतातील मेडिकल कॉलेजमधून जितके डॉक्टर्स बाहेर पडले नसतील तितके डॉक्टर्स येत्या १० ते १२ वर्षात देशाला इतके मिळणार आहेत. उत्तर प्रदेशात ज्या वेगानं मेडिकल कॉलेजेस तयार होत आहेत. त्याचा सकारात्मक परिणाम म्हणजे मेडिकलच्या जागा आणि डॉक्टर्सची संख्या वाढणार आहे. जास्त जागा उपलब्ध झाल्यानं आता गरीब पालकांच्या मुलांचंही डॉक्टर होण्याच स्वप्न पूर्ण होणार आहे.