नवी दिल्ली- बिहारच्या दरभंगा जिल्ह्यातील एका पुजाऱ्याने मंदिरात पूजा करण्यासाठी आलेल्या महिलेला मारहाण केल्याची घटना घडली आहे. पुजाऱ्याने महिलेचे केस पकडून तिला मारहाण केली. या घटनेचा व्हिडिओ व्हायरल होत आहे. व्हायरल व्हिडिओनंतर मंदिर कमेटीने पुजाऱ्याविरोधात कारवाई केली असून प्रकरणी चौकशी करण्याचे आदेश दिले आहेत. सध्या पुजाऱ्याला मंदिरातील कार्य करण्यावर बंदी आणण्यात आली आहे. (National Latest Marathi News)

घटना दरभंगाच्या राज परिसरमधील माँ श्यामा माई मंदिरेच्या पायऱ्यांवर घडली आहे. याठिकाणी पुजाऱ्याने मंदिरात आलेल्या महिलेचे केस पकडून तिला मारहाण केली. या घटनेचा एकाने व्हिडिओ शूट केला. त्यानंतर हा व्हिडिओ सोशल मीडियावर मोठ्या प्रमाणात व्हायरल होऊ लागला. मंदिर हा व्हिडिओ कमेटीच्या निदर्शनास आला. मंदिर कमिटीने तत्काळ कारवाई करत मंदिराच्या पुजाऱ्याला मंदिरासंबंधी कामापासून मुक्त केले आहे.

असे असले तरी महिलेकडून अजून कोणतीही तक्रार दाखल करण्यात आलेली नाही. महिलेची ओळख पटू शकलेली नाही. माहितीनुसार, घटना दोन दिवसांपूर्वीची आहे. महिला मंदिरात जाऊन श्यामा माईच्या पूजेचा हट्ट करत होती. कोरोना महामारीच्या पार्श्वभूमीवर सर्वसामान्यांसाठी मंदिराचे दरवाजे बंद करण्यात आले आहेत.

माहितीनुसार, महिला मंदिराचे दरवाजे उघडण्याची मागणी करत होती. या मुद्द्यावरुन पुजारी आणि महिलेमध्ये वाद निर्माण झाला. वादादरम्यान संतापलेल्या पुजाऱ्याने महिलेचे केस पकडत तिला मारहाण सुरु केली. व्हिडिओची पुष्टी करत मंदिर कमिटीचे सदस्य चौधरी हेमचंद्र रॉय यांनी म्हटलं की, 'महिलेसोबतचे हे वर्तन योग्य नाही. पुजाऱ्याकडून स्पष्टीकरण मागण्यात आलं आहे. याप्रकरणी चौकशी करण्यात येत आहे. '