नवी दिल्ली : ऑलिम्पिकपटू महिला खेळाडूंचं लैंगिक शोषण केल्याप्रकरणी भारतीय कुस्ती महासंघाचे अध्यक्ष बृजभूषण शरण सिंह यांच्याविरोधात लैंगिक गुन्ह्यांपासून मुलांचे संरक्षण कायदा 2012 (POCSO) अंतर्गत गुन्हा दाखल करण्यात आला आहे. यांसह महिला खेळाडूंना अपमानास्पद वागणूक दिल्याबद्दल दुसरा विनयभंगाचा गुन्हाही त्यांच्यावर दाखल करण्यात आला आहे. पीटीआयनं पोलीस अधिकाऱ्यांच्या हवाल्यानं याबाबत वृत्त दिलं आहे.

दिल्लीचे पोलीस उपायुक्त प्रणव दयाल यांच्या माहितीनुसार, महिला कुस्तीपटुंच्या तक्रारीवरुन भारतीय कुस्ती महासंघाचे अध्यक्ष बृजभूषण शरण सिंह यांच्याविरोधात कॉनॉट प्लेस पोलीस ठाण्यात दोन गुन्हे दाखल करण्यात आले आहेत.

बृजभूषण सिंह यांच्यावरील पहिली एफआयआर अल्पवयीन पीडित महिला खेळाडूनं केलेल्या आरोपांशी संबंधित आहे. ज्यासाठी त्यांच्यावर POCSO कायद्यांतर्गत विनयभंगा संबंधित IPCचं कलम लावण्यात आलं आहे. इतर, प्रौढ महिला खेळाडूंनी केलेल्या तक्रारींची सर्वसमावेशक चौकशी करण्यासाठी दुसरी एफआयआर विनयभंगाशी संबंधित कलमांतर्गत नोंदवली आहे, असंही पोलीस उपायुक्त प्रणव दयाल यांनी सांगितलं आहे.