कुस्ती महासंघाचे अध्यक्ष आणि भाजप खासदार ब्रिजभूषण शरण सिंग यांच्याविरोधात लैंगिक छळाच्या प्रकरणात दिल्ली पोलिसाच्या कारवाईला सुरूवात केली आहे. या प्रकरणी दिल्ली पोलिसांचे एक पथक सोमवारी रात्री ब्रिजभूषण सिंग यांच्या लखनऊ आणि गोंडा येथील घरी पोहचले. यावेळी एसआयटीने ब्रिजभूषण यांच्या घरात उपस्थित १२ लोकांचे जवाब देखील नोंदवले आहेत.

दिल्ली पोलिसांनी ब्रिजभूषण शरण सिंग यांच्या सोबत तसेत घरी काम करणाऱ्या लोकांचे नाव-पत्ते आणि ओळखपत्र साक्षीदार म्हणून गोळा केले आहेत. या चौकशीनंतर पोलिसांचे पथक दिल्लीला परत आले.

विनेश फोगाट, साक्षी मलिक आणि बजरंग पूनिया यांच्या नेतृत्वात सर्वा कुस्तीपटूंचे भाजप खासदार ब्रिजभूषण सिंह यांच्या विरोधात आंदोलन सुरू आहे. कुस्तीपटूंनूी त्यांच्यावर लैंगिक छळाचे आरोप केले आहेत.

ब्रिजभूषण शरण सिंग यांच्या विरोधात ७ महिला कुस्तीपटूंनी २१ एप्रिल रोजी कनॉट प्लेस पोलिस स्टेशनमध्ये ब्रिजभूषण यांच्याविरोधात तक्रार दाखल केली होती. या तक्रारीच्या आधारे २८ एप्रिल रोजी दिल्ली पोलिसांनी ब्रिजभूषण यांच्याविरोधात लैंगिक छळाचे दोन गुन्हे नोंदवले.

पहिला गुन्हा एका अल्पवयिन कुस्तिपटूने केलेल्या आरोपांनुसार असून यामध्ये पॉक्सो अॅक्ट नुसार गुन्हा नोंदवण्यात आला आहे. तर दुसरी एफआयआर इतर कुस्तीपटूंनी केलेल्या आरोपांसंबधित आहे. या प्रकरणांची पोलिसांकडून चौकशी सुरू आहे. पोलिसांनी आतापर्यंत १३७ लोकांची साक्षी घेतली आहे.

कुस्तीपटू नोकरीवर परतले

शनिवारी कुस्तीपटूंनी गृहमंत्री अमित शाह यांची भेट घेतली होती, या बैठकीनंतर सोमवारी बजरंग पूनिया, साक्षी मलिक आणि विनेश फोगाट हे रल्वेतील त्यांच्या कामावर परत गेले आहेत.