Gunjan Patidar Co-Founder Zomato Resigned : ऑनलाइन फूड ऑर्डरिंग प्लॅटफॉर्म झोमॅटो लिमिटेडचे ​​सह-संस्थापक आणि मुख्य तंत्रज्ञान अधिकारी (Chief Technology Officer) गुंजन पाटीदार यांनी सोमवारी आपल्या पदाचा राजीनामा दिला. कंपनीने शेअर मार्केटला दिलेल्या फाइलिंगमध्ये म्हटले आहे की पाटीदार हे झोमॅटोच्या पहिल्या काही कर्मचाऱ्यांपैकी एक होते आणि त्यांनी कंपनीसाठी मुख्य तंत्रज्ञान प्रणाली तयार केली होती.

झोमॅटोने सांगितले की, "कंपनीला पुढे नेण्यात त्यांचे योगदान अमूल्य आहे." तथापि, कंपनीने त्यांच्या राजीनाम्याचे कारण सांगितलेले नाही. गेल्या वर्षी नोव्हेंबरमध्ये कंपनीचे आणखी एक सह-संस्थापक मोहित गुप्ता यांनी राजीनामा दिला होता. गुप्ता साडेचार वर्षांपूर्वी झोमॅटोमध्ये सामील झाले होते. 2020 मध्ये कंपनीच्या फूड डिलीव्हरी व्यवसायाच्या सीईओ (मुख्य कार्यकारी अधिकारी) पदावरून पदोन्नती देऊन त्यांना सह-संस्थापक बनवण्यात आले होते.

सध्यातरी ऑनलाइन फूड डिलिव्हरी कंपनी झोमॅटोच्या अडचणी थांबण्याचे नाव घेत नाहीयेत. एकामागून एक सह-संस्थापक कंपनीला बाय-बाय म्हणत आहेत. एकीकडे कंपनीचे शेअर्स शेअर बाजारात वाईट काळातून जात असताना, दुसरीकडे अशा बातम्या समोर येत आहेत. याआधी झोमॅटोचे आणखी एक सह-संस्थापक मोहित गुप्ता यांनी नोव्हेंबरमध्ये कंपनी सोडली होती, त्यानंतर आता गुंजन पाटीदार यांनीही राजीनामा दिला आहे. यामुळे कंपनीच्या अडचणी आणखी वाढण्याची शक्यता आहे.