अलीकडच्या काळात, सोशल मीडिया प्लॅटफॉर्म दैनंदिन जीवनाचा अविभाज्य भाग बनले आहेत. सर्व कंपन्या त्यांच्या मार्केटिंगसाठी सोशल मीडिया प्लॅटफॉर्मचा वेगवेगळ्या प्रकारे वापर करतात. यासोबतच काही वेळा कंपन्या त्यांचे विचित्र अनुभव शेअर करत असतात. असंच एक प्रकरण आता चर्चेत आलं आहे. Zomatoने आलेला एक अनुभव ट्विटद्वारे शेअर केला आहे, यामुळे सोशल मीडियावर मीम्सचा पाऊस सुरू झाला आहे

घटना अशी आहे की, भोपाळमध्ये अंकिता नावाच्या मुलीने तिच्या एक्स बॉयफ्रेंडला त्रास देण्यासाठी एक मार्ग शोधला आहे. तिने झोमॅटोच्या ऑनलाइन फूड डिलिव्हरी अॅपचा वापर करत बॉयफ्रेंडसह झोमॅटोलाही वैताग आणला आहे. घडलं असं, की अंकिता तिच्या एक्स बॉयफ्रेंडसाठी झोमॅटोवरून कॅश ऑन डिलिव्हरीवर वारंवार जेवण ऑर्डर करत होती. त्याचवेळी तिचा बॉयफ्रेंड प्रत्येक वेळी पैसे देण्यास आणि ते जेवण घेण्यास नकार देत असे. अशा परिस्थितीत वैतागलेल्या झोमॅटोने शेवटी ट्विटच केलं.

भोपाळच्या अंकिताला ट्विटद्वारे आवाहन करत, झोमॅटोने 2 ऑगस्टला ट्विट केलं आहे. या ट्विटमध्ये लिहिलं आहे की ‘भोपाळची अंकिता, आता बस करा. तुमच्या एक्स बॉयफ्रेंडसाठी कॅश ऑन डिलिव्हरीवर जेवण ऑर्डर करणं थांबवा. तुमच्या एक्सने आम्हाला पैसे देण्यास नकार दिल्याची ही तिसरी वेळ आहे’. झोमॅटो अनेकदा मनोरंजक पोस्ट करत असते.

अशा परिस्थितीत लोकांना प्रश्न पडला आहे, खरोखरच अंकिता नावाच्या मुलीने झोमॅटोला वैताग दिला आहे. की, मजा घेण्यासाठी त्यांनी स्वत:हून या पात्राची कल्पना केली आहे? प्रकरण काहीही असलं तरी झोमॅटोची ही अनोखी पोस्ट मोठ्या प्रमाणात व्हायरल झाली आहे.