उल्हासनगर - चक्क मुंबई मधील कॉलेजचे बोगस ट्रान्सफर सर्टिफिकेट बनवणाऱ्या 12 विद्यार्थ्यांनी उल्हासनगरातील कॉलेजमध्ये ऍडमिशन घेतल्याचा पर्दाफाश मुंबई विद्यापीठाच्या उप कुलसचिवांनी केला आहे.त्यांनी दिलेल्या तक्रारीवरून या 12 विद्यार्थ्यांवर विठ्ठलवाडी पोलीस ठाण्यात फसवेगिरीचा गुन्हा दाखल करण्यात आला आहे.

कॅम्प नंबर 4 मध्ये मौर्या नगरीच्या रोडवर विशेषतः शैक्षणिक आणि क्रिडा क्षेत्रात नावलौकिक मिळवणारे एस.एस.टी कॉलेज आहे.2018 साली 12 विद्यार्थ्यांनी विक्रोळी येथील संदेश कॉलेजच्या नावाने बोगस ट्रान्सफर सर्टिफिकेट बनवून एस.एस.टी कॉलेजमध्ये ऍडमिशन घेतले होते.ही घटना मुंबई विद्यापीठाच्या निदर्शनास आल्यावर गुरुवारी 28 तारखेला मुंबई विद्यापीठाचे उप कुलसचिव अशोक घुले यांनी विठ्ठलवाडी पोलीस ठाण्यात दिलेल्या तक्रारीनुसार या 12 विद्यार्थ्यांवर कलम 420,456,471,34 अंतर्गत फसवेगिरी करण्याचा गुन्हा दाखल करण्यात आला आहे.

अपात्र विदयार्थ्यांनी बोगस कागदपत्रांचा वापर करुन ऍडमिशन मिळविल्याचे निष्पन्न झाल्यावर संबंधीत एस.एस.टी कॉलेजने तकार नोंदविणे अपेक्षित होते असे अशोक घुले यांनी फिर्यादित नमूद केले आहे.पण एस.एस.टी कॉलेजने असे का केले नाही ?असा प्रश्न यावेळी उपस्थित झाला आहे.या प्रकरणाचा तपास वरिष्ठ पोलीस निरीक्षक अनिल पडवळ यांच्या मार्गदर्शनाखाली पोलीस निरीक्षक विक्रम गौड करत आहेत.

या संदर्भात वरिष्ठ पोलीस निरीक्षक अनिल पडवळ यांच्याशी संपर्क साधला असता या विद्यार्थ्यांचे पत्ते निष्पन्न होत नसले तरी लवकरच त्यांचा ठावठिकाणा शोधून काढण्यात येणार असल्याचे पडवळ यांनी सांगितले.