मलकापूर : इयत्ता बारावी व दहावी बोर्ड परीक्षांवर (12th and 10th Board Exams) महाराष्ट्र राज्य शिक्षण संस्था महामंडळ पुणे यांनी घातलेला बहिष्कार तात्पुरता स्थगित केला आहे. महामंडळाच्या कार्यकारिणीच्या सभेत परीक्षांवर बहिष्कार घालण्याचे ठरले होते; परंतु शिक्षणमंत्री दीपक केसरकर (Deepak Kesarkar) व शिक्षण सचिव शिक्षण संचालक यांची (ता. १२) बालभवन मुंबई येथे शिक्षण संस्था महामंडळाची बैठक आयोजित केली होती.

बैठकीत काही मागण्या मान्य केल्या, तर काही मागण्या लवकर पूर्ण करू, असे आश्वासन दिल्यानंतर परीक्षांवर बहिष्कार मागे घेण्यात आला, अशी माहिती महाराष्ट्र राज्य शिक्षण संस्था महामंडळाचे उपाध्यक्ष अशोकराव थोरात (Ashokrao Thorat) यांनी दिली.

बैठकीत पवित्र पोर्टल प्रणालीद्वारे शिक्षक भरती करण्यासाठी महाराष्ट्रात सर्व शिक्षण संस्थांनी जाहिराती दिल्या पाहिजेत व उच्च न्यायालयाच्या निर्णयाप्रमाणे सर्व वैधता तपासून भरती करण्याबाबत शिक्षण मंत्रालय अंतर्गत बैठक घेणार. शिक्षकेतर कर्मचारी भरतीबाबत उच्च न्यायालय मुंबई यांनी स्थगिती उठवली असल्याने शिक्षकेतर कर्मचारी भरती विनाविलंब करण्याचे शिक्षणमंत्री यांनी मान्य केले. संच मान्यता व अतिरिक्त शिक्षक समायोजनाबाबत सचिव व शिक्षणमंत्री यांनी संच मान्यतेचे कॅम्प त्वरित घेऊन प्रलंबित संच मान्यता पूर्ण कराव्यात, असे सांगितले.

वेतनेतर अनुदान गेल्या वर्षाचे वेतनेतर अनुदान ज्यांना मिळाले नाही ते दिले जाईल व या वर्षासाठी मागील वर्षासह २७० कोटी वेतनेतर अनुदान ३१ मार्चपूर्वी उपलब्ध करून देण्यासाठी सर्व तयारी पूर्ण झाली असून, वित्त विभागाकडे प्रस्ताव आताच पाठवला आहे. तो लवकरच मंजूर होईल व ३१ मार्चपूर्वी वेतनेतर अनुदान दिले जाईल.

अशा आहेत मागण्या

• शासनाने नवीन शाळा (इंग्रजी, मराठी) वाटप धोरण आल्याशिवाय नवीन शाळा वाटप बंद करावे.

• नवीन शैक्षणिक धोरण राबवण्या आधी शिक्षक, शिक्षकेतर कर्मचारी निर्धारणाचे निकष नव्याने ठरविण्यात यावेत.

• गुणवत्तापूर्ण शिक्षण व विद्यार्थी केंद्रित धोरण ठरवण्यात यावे.

• शिक्षणावर होणारा खर्च मर्यादित न ठेवता राष्ट्रीय उत्पन्नाच्या ६ टक्के करण्यात यावा.

• कंत्राटी, घड्याळी तासिकानुसार शिक्षक, प्राध्यापक भरती पूर्णपणे बंद करण्यात यावी.