पुणे - केंद्रीय माध्यमिक शिक्षण मंडळाच्या (सीबीएससी) (CBSE) इयत्ता १० वी (SSC) आणि १२ वीच्या (HSC) दुसऱ्या सत्रातील परीक्षा ऑफलाईन (Exam Offline) पद्धतीने आयोजित करण्यात येणार आहे. बुधवारी सीबीएससीच्या वतीने यासंबंधीची अधिकृत घोषणा करण्यात आली.

सीबीएससीच्या परीक्षा नियंत्रक संयम भारद्वाज म्हणाले,‘‘कोरोनाच्या पार्श्वभूमीवर मंडळाने सर्वांशी चर्चा करून ऑफलाईन परीक्षांचा निर्णय घेतला आहे. दुसऱ्या सत्राची लेखी परीक्षा २६ एप्रिलपासून सुरू होणार आहे. त्यासंबंधीचे वेळापत्रक लवकरच घोषित करण्यात येणार आहे. प्रश्नपत्रिकेचे स्वरूप नेहमीप्रमाणे असणार असून, नमुना प्रश्नपत्रिका सीबीएससीच्या संकेतस्थळावर उपलब्ध करण्यात आल्या आहे.’’

विद्यार्थ्यांचे परीक्षा केंद्रही मागील वर्षाप्रमाणे असणार असल्याचेही भारद्वाज म्हणाले. कोरोना साथीच्या पार्श्वभूमीवर मागील वर्षी परीक्षा घेता आल्या नाही. म्हणून पर्यायी मूल्यांकन पद्धतीचा अवलंब सीबीएससीने केला होता. त्यामुळे या वर्षी परीक्षा दोन सत्रात विभागण्यात आली आहे. मागील वर्षी नोव्हेंबर- डिसेंबरमध्ये ऑफलाईन पद्धतीने प्रथम सत्राची परीक्षा घेण्यात आली होती.

अधिक माहितीसाठी संकेतस्थळ - https://www.cbse.gov.in/