पुणे : राष्ट्रीय शैक्षणिक धोरणा संदर्भात पालक आणि विद्यार्थ्यांना माहिती व्हावी म्हणून सावित्रीबाई फुले पुणे विद्यापीठाने जनजागृती कार्यक्रमाचे आयोजन केले आहे. शिक्षक आणि शैक्षणिक संस्थांसोबत पालक आणि विद्यार्थी हा देखील महत्वाचा घटक आहेत. त्यांच्यापर्यंत या बदलांची माहिती प्रभावीपणे पोहोचावी म्हणून गुरूवारी (ता.६) हा वर्ग आयोजित केल्याचे विद्यापीठाचे कुलगुरू डॉ.कारभारी काळे यांनी दिली.

विद्यापीठात आयोजित पत्रकार परिषदेत ते बोलत होते. यावेळी प्र- कुलगुरू डॉ.संजीव सोनवणे, व्यवस्थापन परिषद सदस्य व कार्यक्रमाचे संयोजक रविंद्र शिंगणापूरकर, अंतर्गत गुणवत्ता आणि सिद्धता कक्षाचे संचालक डॉ.संजय ढोले आदी उपस्थित होते.

शैक्षणिक धोरणाची अंमलबजावणी ही सर्वसमावेशक पद्धतीने प्रत्येक घटकाची बाजू, म्हणणे लक्षात घेऊन करण्यात यावी या उद्देशाने हा अभिनव प्रयोग विद्यापीठ करत असल्याचे डॉ. सोनवणे यांनी स्पष्ट केले. तर शिंगणापूरकर म्हणाले, ‘‘दुपारी ३ ते ५ या वेळेत विद्यापीठाच्या मुख्य इमारतीतील संत ज्ञानेश्वर सभागृहात हा कार्यक्रम होणार आहे.

विद्यापीठाचे माजी कुलगुरू आणि राष्ट्रीय शैक्षणिक धोरणाच्या राज्य सुकाणू समितीचे अध्यक्ष डॉ.नितीन करमळकर, मुंबई विद्यापीठाचे प्र- कुलगुरू प्रा. डॉ.आर.डी.कुलकर्णी तसेच जळगावच्या एम.जे.महाविद्यालयाचे निवृत्त प्राचार्य डॉ.अनिल राव आदी यावेळी उपस्थित असतील. गुगल लिंकवर अर्ज करत पालक व विद्यार्थी यात सहभागी होऊ शकता.’’ ऑनलाईन पद्धतीनेही आपल्याला यात सहभाग नोंदविता येणार आहे.