न्यूयॉर्क - अमेरिकन आयटी कंपनी Cognizant या वर्षी जवळपास एक लाख लोकांना नोकरी देणार आहे. कॉग्निजेंटचे भारतात जवळपास 2 लाख कर्मचारी आहेत. या कंपनीचे आर्थिक वर्ष जानेवारी ते डिसेंबर असे असते. कंपनीने सांगितलं की, जूनच्या तिमाहीमध्ये त्यांच्या एकूण उत्पन्नात 41.8 टक्के वाढ झाली असून ते 51.2 कोटी अमेरिकन डॉलर म्हणजेच भारतीय चलनानुसार 3 हजार 800 कोटी रुपये इतकं झालं आहे. कंपनीने जून 2020 च्या तिमाहीत एकूण उत्पन्न 36.1 कोटी डॉलर्स इतकं होतं.

यंदा जूनच्या तिमाही अखेरपर्यंत कंपनीचे जवळपास 3 लाख कर्मचारी होते. कॉग्निजेंटचे सीईओ ब्रायन हम्फ्रीज यांनी सांगितलं की, आम्हाला वाटतं की, आम्ही 2021 मध्ये 1 लाख कर्मचाऱ्यांची भरती करू आणि 1 लाख असोसिएट्सना प्रशिक्षण देऊ. याशिवाय कॉग्निजेंट 2021 मध्ये 30 हजार फ्रेशर्स घेणार आहे तर भारतात 45 हजार फ्रेशर्सना घेण्याचा प्रस्ताव देण्याचा विचार करत आहे.

कॉग्निजेंटने आर्थिक वर्ष 2021 साठी उत्पन्न वृद्धीसाठीचं लक्ष्य वाढवून 10.2 ते 11.2 टक्के इतकं केलं आहे. या तिमाहीमध्ये कंपनीचं उत्पन्न 14.6 टक्के वाढून 4.6 अब्ज डॉलर इतकं झालं. जे एक वर्ष आधी याच कालावधीत चार अब्ज डॉलर होतं. कंपनीच्या अंदाजापेक्षा ही आकडेवारी जास्त आहे. कॉग्निजेंटने सीईओ ब्रायन हम्फ्रीज यांनी सांगितलं की, आम्ही दुसऱ्या तिमाहीत चांगली कमाई झाली. गुंतवणुकीच्या माध्यमातून आम्ही आमच्या कक्षा विस्तारत आहे.

तिसऱ्या तिमाहीतील उत्पन्नाचा अंदाज व्यक्त करताना तो 4.69 ते 4.74 अब्ज डॉलर्स इतका सांगितला आहे. तर आर्थिक वर्ष 2021 चा वर्षभराचा अंदाज हा 18.4 ते 18.5 अब्ज अमेरिकन डॉलर इतका असेल असंही कंपनीने म्हटलं आहे.

कॉग्निजेंटचे मुख्य वित्तीय अधिकाऱ्यांनी सांगितलं की, सेवांच्या कक्षा विस्तारण्यासाठी ग्राहकांची मागणी पूर्ण करण्यासाठी कर्मचारी भरती सुरु ठेवली असून त्यामध्ये कंपनी गुंतवणूक करत आहे. जूनच्या तिमाही अखेरपर्यंत कंपनीतील कर्मचाऱ्यांची संख्या 3 लाखांपर्यंत पोहोचली आहे.