पुणे - बारावीची पुरवणी परीक्षेचा निकाल येत्या आठवड्यात जाहीर होणार आहे. परंतु दरम्यान, या परीक्षेत उत्तीर्ण होणाऱ्या विद्यार्थ्यांना व्यावसायिक अभ्यासक्रमातील पुढील शिक्षणाची संधी मिळावी, म्हणून राज्य सामाईक प्रवेश परीक्षा कक्षाने (सीईटी सेल) प्रवेश प्रक्रियेला मुदतवाढ द्यावी, अशी आग्रही मागणी विविध राजकीय, सामाजिक संघटनांनी केली आहे.

राज्यात अभियांत्रिकी, तंत्रज्ञान, विधी यांसारख्या व्यावसायिक अभ्यासक्रमाच्या प्रवेशाची प्रक्रिया सीईटी सेलने पूर्ण केली आहे. राज्यातील जवळपास सव्वा लाखांहून अधिक विद्यार्थ्यांनीही पुरवणी परीक्षा दिली आहे. परंतु सीईटीत पात्र असतानाही बारावीच्या पुरवणी परीक्षेतील निकालाच्या प्रतीक्षेत असणाऱ्या विद्यार्थ्यांचे शैक्षणिक भवितव्य अडचणीत आले आहे.

यासंदर्भात ‘सकाळ’ने आवाज उठविला आहे. पुरवणी परीक्षा देणाऱ्या विद्यार्थ्यांना न्याय मिळवून देण्यासाठी ‘सकाळ’ने हा विषय लावून धरला आहे. दरम्यान, प्रशासनाला अद्याप जाग आली नसली तरी आता राजकीय आणि सामाजिक संघटना मात्र या विद्यार्थ्यांना न्याय मिळून देण्यासाठी पुढे येत आहेत.

राष्ट्रवादी विद्यार्थी काँग्रेस पुणे शहर यांच्या वतीने पुणे विभागीय शिक्षण उपसंचालक कार्यालयात बारावीच्या पुरवणी परीक्षेचा निकाल तातडीने जाहीर करण्याची मागणी करणारे निवेदन दिले आहे. तसेच ‘सीईटी सेल’नेही व्यावसायिक अभ्यासक्रमाच्या ‘कॅप’ फेरीला मुदतवाढ द्यावी, अशी मागणीही राष्ट्रवादी विद्यार्थी काँग्रेसतर्फे करण्यात आली आहे.

यावेळी पुणे शहर अध्यक्ष विक्रम जाधव, कार्याध्यक्ष अजय पवार, युवक उपाध्यक्ष रोहन पायगुडे आदी उपस्थित होते.

बारावीनंतरच्या अभियांत्रिकी आणि तंत्रज्ञान आणि विधी अभ्यासक्रमाच्या प्रवेश प्रक्रियेला मुदतवाढ द्यावी, अशी मागणीचे निवेदन विविध संघटनांनी एकत्रितरीत्या राज्य सामाईक प्रवेश परीक्षा कक्षाचे (सीईटी सेल) आयुक्त महेंद्र वारभुवन यांना दिले आहे.

बारावीच्या पुरवणी परीक्षेत उत्तीर्ण होणाऱ्या विद्यार्थ्यांचे शैक्षणिक वर्ष वाया जाऊ नये, म्हणून या विद्यार्थ्यांना प्रवेशाची संधी उपलब्ध करून द्यावी, अशी मागणी  महाराष्ट्र नागरी कृती समितीचे अध्यक्ष सुरेश जैन, राष्ट्रवादी युवक काँग्रेसचे कार्याध्यक्ष अजिंक्य पालकर, पुणे शहर काँग्रेसचे संघटक सचिव अभिजित महामुनी, भारतीय जनता पक्ष कला व सांस्कृतिक आघाडीचे सरचिटणीस शैलेश बडदे यांनी निवेदनाद्वारे केली आहे.

या विद्यार्थ्यांना न्याय मिळवून देण्यासाठी त्वरित पावले उचलण्यात आली नाहीत, तर तीव्र आंदोलन करण्यात येईल, असा इशाराही या विविध संघटनांनी दिला आहे.