पुणे : शालेय शिक्षण व क्रिडा विभागाच्या ३० जून २०२२ च्या निर्णयानुसार राज्यातील माजी सैनिक, शहिद सैनिक पत्नी व कुटुंबियांना ‘शिक्षक पात्रता परीक्षा २०२१’मध्ये १५ टक्के गुणांची सवलत देण्यात आली आहे. त्यानुसार उमेदवारांची माजी सैनिक आरक्षणांतर्गत नोंद करण्यासाठी, तसेच नावातील स्पेलिंग किंवा जात संवर्ग याबाबत दुरूस्ती करण्यासाठी १० ऑगस्टपर्यंत मुदत देण्यात आली आहे, अशी माहिती महाराष्ट्र राज्य परीक्षा परिषदेच्या आयुक्त शैलजा दराडे यांनी दिली. शिक्षक पात्रता परीक्षा अर्ज भरताना माजी सैनिक आरक्षणांतर्गत नोंद घेण्यात आलेली नाही. तसेच नावातील स्पेलिंग बदल व जातसंवर्ग बदल करण्याबाबत उमेदवारांकडून निवेदने परीक्षा परिषदेकडे आली होती.

त्याचीच दखल घेऊन परीक्षा परिषदेने उमेदवारांच्या नावातील स्पेलिंग किंवा जात संवर्ग याबाबत दुरूस्ती असल्यास ती दुरूस्ती करण्यासाठी आणि माजी सैनिक आरक्षणांतर्गत नोंद करण्याची सुविधा ‘https://mahatet.in’ या संकेतस्थळावर उमेदवारांच्या लॉगिंनमध्ये दिली आहे. नावातील स्पेलिंग बदल करण्यासाठी एसएससी प्रमाणपत्र, जात संवर्ग बदलासाठी जात प्रमाणपत्र, माजी सैनिक आरक्षणाकरिता सक्षम प्राधिकाऱ्याचे प्रमाणपत्र अपलोड करणे आवश्यक आहे. यापूर्वी लेखी किंवा ई-मेलद्वारे निवेदन दिले असल्यास उमेदवारांनी पुनश्च: आपल्या लॉगिनमध्ये अपडेट करणे आवश्यक आहे. तसेच, दिलेल्या मुदतीनंतर तसेच अन्य प्रकारे आलेल्या निवेदनाचा विचार केला जाणार नाही. प्राप्त सर्व दुरूस्त्यांचा विचार करून परीक्षा निकाल लवकरच संकेतस्थळावर जाहीर करण्यात येईल, असेही परीक्षा परिषदेने स्पष्ट केले आहे.