नागपूर : पोलिस भरती-२०१९ (police recruitment) साठी अर्ज केलेल्या सर्व उमेदवारांनी त्यांचे ई-मेल आयडी (email id) आता नव्याने अपडेट करावे लागणार आहेत. त्यासंबंधातील सूचना स्वतः पोलिस महासंचालकांनी दिल्या आहेत. त्यानुसार उमेदवारांना 'www.mahapolice.gov.in ' या संकेतस्थळावर हे मेल आयडी अपडेट करावे लागतील.

उमेदवारांना पासवर्ड व विकल्प निवडण्याबाबत कळविले होते. पासवर्ड सर्वांनी बदलणे गरजेचे आहे. अन्यथा भरती प्रक्रियेत त्यांचे आवेदनपत्र रद्द ठरू शकते, असेही स्पष्ट करण्यात आले आहे. एसईबीसी उमेदवारांना अराखीव, खुला किंवा इतर विकल्प देणे गरजेचे आहे. ई-मेल आयडी विसरले किंवा अन्य कारणास्तव गहाळ झाल्याच्या तक्रारी काही उमेदवारांकडून या कार्यालयाकडे आल्या आहेत. अशा उमेदवारांना ई-मेल अपडेट करण्यासाठी तसेच विकल्प देण्याठी २२ ऑगस्टपर्यंत मुदत वाढवून देण्यात आली आहे.

उमेदवारांनी पोलिस भरती-२०१९ वर क्लिक करून घटकनिहाय संकेतस्थळावर जाऊन विकल्प द्यावा. अथवा ई-मेल आयडी व पासवर्ड बदल करून घ्यावा, असे अतिरिक्त पोलिस महासंचालक संजयकुमार यांनी कळवले आहे.