पुणे - राज्यात अनेक ठिकाणी अतिवृष्टी होत असल्याने शाळा, महाविद्यालयांना सुटी जाहीर केली आहे. त्यामुळे विद्यार्थ्यांना इयत्ता अकरावीसाठी कनिष्ठ महाविद्यालयात प्रत्यक्ष जाऊन प्रवेश घेता येत नाही. त्यामुळे इयत्ता अकरावीच्या पहिल्या विशेष फेरीत निवड झालेल्या विद्यार्थ्यांना प्रवेशासाठी ३१ जुलैपर्यंत मुदतवाढ आली आहे.

पुणे आणि पिंपरी-चिंचवडसह मुंबई, नाशिक, अमरावती आणि नागपूर महापालिका क्षेत्रातील कनिष्ठ महाविद्यालयांमधील इयत्ता अकरावीच्या प्रवेशासाठी केंद्रीय ऑनलाइन प्रवेश प्रक्रिया राबविण्यात येत आहे. माध्यमिक व उच्च माध्यमिक शिक्षण संचालनालयामार्फत ही प्रक्रिया सुरू आहे.

प्रवेश प्रक्रियेत तीन नियमित फेऱ्या झाल्या असून सध्या पहिली विशेष फेरी सुरू आहे. या फेरीत निवड झालेल्या विद्यार्थ्यांना प्रवेशासाठी ही मुदतवाढ दिली असल्याची माहिती शिक्षण विभागाने दिली आहे.