कुडित्रे : कोरोनामुळे विद्यार्थ्यांच्या अभ्यासक्रमावर परिणाम होत असताना जिल्हा परिषदेच्या शाळेत शिक्षकांचा सावळागोंधळ सुरू आहे. शिंगणापूर (ता. करवीर) येथील शिक्षण सभापती रसिका पाटील यांच्या गावातील शाळेतच शिक्षकांची वानवा आहे. चारशे विद्यार्थ्यांना फक्त आठ शिक्षक शिक्षण देत आहेत, त्यामुळे विद्यार्थ्यांच्या शिक्षणावर परिणाम होत आहे. सभापतींच्या गावातच शिक्षकांचा तुटवडा असेल, तर डोंगरी वाड्या-वस्त्यांवर शिक्षकांविना विद्यार्थ्यांचे काय शिक्षण होत असेल, याचा विचार करावा लागणार आहे.

शिंगणापूर येथे पहिली ते सातवीची शाळा आहे. पहिली ते पाचवी २९१ विद्यार्थी व सहावी ते आठवी १०८ असे चारशे विद्यार्थी शिक्षण घेतात. सर्वसामान्य नागरिक, शेतकऱ्यांची मुले येथे शिकतात. विद्यार्थ्यांना ऑनलाइन शिक्षण घेताना कनेक्टिव्हिटी नसणे, मोबाईल नसणे अशा अनेक अडचणींना तोंड द्यावे लागते. त्यातच शिक्षकांचा तुटवडा असल्याने शिक्षणाचा बट्ट्याबोळ उडाला आहे. येथील मुख्याध्यापक, तीन शिक्षक निवृत्त झाले आहेत. दोन शिक्षकांचे प्रमोशन झाले. असे पाच शिक्षक कमी झाले आहेत. यामुळे आठ शिक्षक विविध विषय शिकवत आहेत.

एक शिक्षक दोन वर्गांवर शिकवत असल्याने मुलांमध्ये गोंधळाचे वातावरण आहे. बारावी सायन्सच्या शिक्षकांचे प्रमोशन झाल्यास आणखी तीन शिक्षक कमी होणार आहेत, त्यामुळे फक्त पाच शिक्षक राहतील, असे चित्र आहे. आताच्या पटानुसार पंधरा शिक्षक लागतात; पण आठ शिक्षकांवर अध्यापनाचे काम सुरू आहे. तातडीने शिक्षकांचे नियोजन करण्याची मागणी होत आहे. दरम्यान, शाळेमध्ये हँडवॉश, तसेच स्वच्छतागृहांची कमतरता आहे, यासाठी निधी उपलब्ध व्हावा, अशी मागणीही पालकांतून होत आहे.

"पाच शिक्षक कमी आहेत, मागणी केली आहे, देतो म्हणून फक्त सांगितले जाते. शाळेमध्ये भौतिक सुविधा मिळाव्यात."

- हंबीरराव संकपाळ, सदस्य, शालेय व्यवस्थापन समिती

"शिंगणापूर शाळेतील काही शिक्षक निवृत्त झाले. आता दोन शिक्षक दिले आहेत. येत्या १५ दिवसांत प्रमोशन होईल, यातून येथे शिक्षक मिळतील, आणि जिल्ह्यातच शिक्षकांची संख्या कमी आहे. जिथे गरज आहे, तिथे शिक्षक देण्यासाठी प्रयत्न करू."

- रसिका पाटील, सभापती, शिक्षण समिती, जिल्हा परिषद