औरंगाबाद : व्हीडीओ तयार करताना व्हॉईस ओव्हर महत्वाचा असतो. तुमच्या व्हीडीओचा कंटेंट कितीही चांगला असली तरी सुद्धा तुमच्या व्हिडीओत व्हाईस ओव्हर आर्टिस्टच्या आवाजाचा दर्जा कमी असेल तर व्हीडीओला लाईक, व्ह्युज कमी मिळण्याची शक्यता असता असते. व्यवसाय किंवा ब्रँडला प्रमोट करण्यासाठी चांगल्या माहितीसोबत चांगला आवाज देणारा कलाकार असणे असणे गरजेचे आहे.

त्यामुळे सोशल मिडीयातील व्हीडीओ, वाढत्या ऑनलाईन मार्केटींगमधील आवाजाच्या जादुई दुनियेत वॉईस ओव्हर आर्टिस्ट, व्हॉईस अक्टर्स आणि डबिंग आर्टिस्ट म्हणून तरुणांना रोजगार मिळविण्याच्या संधी निर्माण झाल्या आहेत. वॉईस एक्टिंगच्या अगदी नव्या संधींपैकी एक म्हणजे ऑडियो बुक्ससाठी आवाज देणे तसेच ई लर्निंग.

भाषेवर प्रभुत्व हवेच

व्हाईस ओव्हर क्षेत्राविषयी एक मोठा गैसमज पाहायला मिळतो तो म्हणजे या क्षेत्रा येण्यासाठी भारदस्त आवाज हवा मात्र असे काही नाही. तुम्ही ज्या भाषेत व्हाईस ओव्हर करताय किंवा करणार आहात त्या भाषेवर तुमचे प्रभुत्व हवे. तुमचे बोलणे स्पष्ट असले पाहिजे. प्रत्येक शब्द नीट उच्चारता आला पाहिजे. ऐकणाऱ्या खिळवून ठेवता येईल असे तुमचे बोलणे असायला हवे.

व्हाईस ओव्हरचं शिक्षण कोणीही घेऊ शकतं. त्याला वयाची, शिक्षणाची कुठलीच अट नाही. आवाज कसा लावावा, तो केंव्हा, कसा बदलावा, आपल्या आवाजाद्वारे, श्रोत्यांना कसं खिळवून ठेवता येतं, या गोष्टींबद्दल तुम्हाला कुतूहल असेल, तुम्ही स्वत:च्या आवाजावर नव-नवीन प्रयोग करण्यास उत्सुक असाल, आणि आपल्या आवाजाच्या माध्यमातून तुम्हाला अर्थार्जन करायचं असेल, तर तुम्ही एक वॉईस आर्टिस्ट बनू शकता.

घरबसल्या होऊ शकता व्हॉईस ओव्हर आर्टीस्ट

सिनेमे, टीव्ही सीरीयल्स, कार्टून फिल्म, जाहिराती अशा अनेक क्षेत्रांत व्हाईस आर्टिस्ट लागतात. अगदी प्रचार, घोषणा, यांमध्ये आपल्याला ऐकू येणारे आवाजही वॉईस ओव्हर आर्टिस्ट्सचाच असतो. तुम्ही फोन केल्यावर कित्येक वेळा रेकॉर्ड केलेला आवाज येतो तो सुद्धा व्हाईस ओव्हर आर्टीचाच असतो. त्यामुळे तरुणांना यामध्ये नोकरीची, रोजगार मिळविण्याची संधी आहे. अनेक कंपन्या आणि मनोरंजन क्षेत्रात काम करणारे लोक, पूर्णवेळ किंवा अर्धवेळ तत्वावर नोकऱ्या देतात. तसेच फ्रीलांसर म्हणून तुम्हाला काम करण्याची संधी आहे. तुमच्याकडे स्टुडियो असेल किंवा तुमच्याकडे, रेकॉर्डिंगसाठी लागणारी पुरेशी साधन-सामग्री असेल तर घरबसल्या सेवा देऊ शकता.

विविध क्षेत्रात गरज

ऍनिमेशन, कार्टून आणि रेडीओ, टीव्ही जाहिराती, विविध व्यवसाय-उद्योग, शिक्षण क्षेत्रात रेकोर्डिंग्स करून घेण्यासाठी वॉईस ओव्हर आर्टिस्ट ची गरज असते. इंटरनेटवरील जाहिराती तसंच पोडकास्ट्समध्ये चांगल्या आवाजांची गरज असते.टीव्ही आणि रेडियो वरच्या जाहिरातींमध्ये वॉईस आर्टिस्टला रोजगाराच्या संधी आहे. कार्टून प्रमाणे व्हिडिओ गेम्स मधील पात्रांना आवाज देणे, वॉईसमेल आणि टेलीफोन रेकोर्डिंगमधेही मागणी आहे. नॅशनल जिओग्रोफीवर मालिकामधला विविध भाषेंमधील आवाज असो, व्हिडीओ माहिती पट, डाक्युमेंटरी अशा विविध क्षेत्रात तरुणांना संधी आहे.

व्हाईस ओव्हर शिकण्यासाठी तुम्ही सुरवातीला इंटरनेटचा आधार घेऊ शकता. इंटरनेटवर व्हाईस ओव्हरसंबंधी अनेक व्हीडीओ आहेत. ज्यातून तुम्ही अगदी मोफत शिकू शकता. तसेच कोर्स करुन किंवा एखाद्या तज्ञ व्यक्तीकडून मार्गदर्शन घेऊ शकता. स्वतःचा रेकॉर्डींग स्टुडीओ सुरु करुन वेगवेगळ्या प्रकारचे प्रोजेक्ट घेऊ शकता.

-निखिल नवगिरे, व्हाईस ओव्हर आर्टीस्ट