LIC AE AAO Mains Exam : भारतीय आयुर्विमा महामंडळानं (LIC) सहाय्यक अभियंता (AE) आणि सहाय्यक प्रशासकीय अधिकारी (AAO) या पदांच्या भरतीसाठी मुख्य परीक्षेच्या तारखेबाबत एक अधिसूचना जारी केलीय. दरम्यान, जे उमेदवार मुख्य परीक्षेला बसणार आहेत, ते LIC च्या अधिकृत वेबसाइटवरून licindia.in परीक्षेचं वेळापत्रक डाउनलोड करू शकतात. अधिसूचनेनुसार, मुख्य परीक्षा 31 ऑक्टोबर 2021 रोजी आयोजित करण्यात येईल, असं नमूद केलंय.

दरम्यान, पूर्व परीक्षा उत्तीर्ण झालेले उमेदवारच या मुख्य परीक्षेला बसू शकतात. मुख्य परीक्षा दोन भागांमध्ये घेतली जाईल, तर परीक्षा उत्तीर्ण होणाऱ्या उमेदवारांना मुलाखतीसाठी बोलावलं जाईल. या परीक्षेचं प्रवेशपत्र लवकरच जारी करण्यात येणार असून निवडलेल्या उमेदवारांचं किमान वेतन 32795 रुपये प्रति महिना आणि कमाल वेतन 62315 रुपये प्रति महिना असणार आहे.

या भरती प्रक्रियेद्वारे 218 रिक्त जागा भरल्या जाणार असून यात सहाय्यक अभियंताची 50 पदं आणि सहाय्यक प्रशासकीय अधिकाऱ्यांची 168 पदं भरली जातील. या पदांसाठी अर्ज करण्याची प्रक्रिया 25 फेब्रुवारी 2021 पासून सुरू झाली, तर अर्ज करण्याची अंतिम तारीख 15 मार्च 2021 निश्चित करण्यात आली होती. कोरोना लॉकडाउनमुळं 9 उमेदवारांना पूर्व परीक्षेसाठी बराच काळ प्रतीक्षा करावी लागली. दरम्यान, 28 ऑगस्ट 2021 रोजी पूर्व परीक्षा घेण्यात आली आणि त्याचा निकाल 29 सप्टेंबर 2021 रोजी जाहीर झाला होता.