पुणे - राज्यातील अभियांत्रिकी, वास्तुशास्त्र, व्यवस्थापन महाविद्यालयांमध्ये निमंत्रित अध्यापक म्हणून येणाऱ्या मान्यवरांच्या मानधनात आता उच्च व तंत्र शिक्षण विभागाने वाढ केली आहे. या महाविद्यालयांमध्ये निमंत्रित अध्यापक म्हणून जाणाऱ्या अनुभवी, तज्ज्ञ यांना हे वाढीव मानधन एप्रिलपासून लागू होणार आहे.

तंत्र शिक्षण संचालनालयातंर्गत येणाऱ्या अभियांत्रिकी, वास्तुशास्त्र, औषधनिर्माणशास्त्र, हॉटेल मॅनेजमेंट ॲण्ड केटरिंग टेक्नॉलॉजी, व्यवस्थापन महाविद्यालये, तंत्रनिकेतन या संस्थांमध्ये विविध क्षेत्रांतील तज्ञ व्यक्तींना अध्यापन किंवा मार्गदर्शनासाठी निमंत्रित करण्यात येते. परंतु या अनुभवी, तज्ञ मान्यवरांना अल्प मानधनाच्या आधारे बोलाविणे आणि अभ्यासक्रमाचा दर्जा टिकविणे जिकिरीचे होत आहे. त्याअनुषंगाने संबंधित महाविद्यालयांमधील निमंत्रित अध्यापकांच्या मानधनात सुधारणा करण्याची बाब राज्य सरकारच्या विचाराधीन होती. त्यानुसार विविध अभ्यासक्रमांसाठी निमंत्रित करणाऱ्या येणाऱ्या अभ्यागत अध्यापकांना सुधारित मानधन एप्रिलपासून लागू करण्यात असल्याचे उच्च व तंत्र शिक्षण विभागाचे कार्यासन अधिकारी श्रीकृष्ण पगारे यांनी अध्यादेशाद्वारे स्पष्ट केले आहे.

या निर्णयानुसार तंत्र शिक्षण संचालनालयातंर्गत राबविण्यात येणाऱ्या पदवी, पदव्युत्तर पदवी, पदविका आता विविध अभ्यासक्रमांसाठी उद्योग, व्यवसाय क्षेत्रातून निमंत्रित केलेल्या तज्ञ, अनुभवी ज्येष्ठ अभियंत्यांना आतापर्यंत एक हजार रुपये प्रति तास देण्यात येत होते. या मानधनात सुधारणा केली असून आता प्रति तास दीड हजार रुपये मानधन दिले जाणार आहे.

या तासिका तत्त्वावरील अध्यापकांची नियुक्ती एका शैक्षणिक वर्षासाठी कमाल नऊ महिन्यांसाठी तात्पुरत्या स्वरूपात असेल. ही नियुक्ती तात्पुरत्या स्वरूपाची असल्यामुळे त्यांना नियमित सेवेचे कोणतेही हक्क मिळणार नाही. त्यामुळे निमंत्रित अध्यापकांकडून ‘भविष्यात सेवेत कायम करण्याची मागणी करणार नाही. तसेच, नियमित सेवेच्या कोणत्याही हक्कांची मागणी करणार नाही’ असे शंभर रुपयांच्या स्टॅम्प पेपरवर हमीपत्र घेण्यात येईल, असे उच्च व तंत्र शिक्षण विभागाने स्पष्ट केले आहे.