पुणे - महाराष्ट्र लोकसेवा आयोगामार्फत घेण्यात येणारी संयुक्त पूर्व परीक्षा रविवारी (ता.३०) पार पडत आहे. एकूण आठ संवर्गातील ८ हजार १६९ पदांच्या भरतीसाठी एमपीएससीकडून ही पूर्व परीक्षा घेण्यात येत असून, एमपीएससीच्या आजवरच्या इतिहासातील सर्वाधिक पदांसाठीची ही पहिलीच भरती प्रक्रिया आहे.

अराजपत्रित गट-ब आणि गट-क संवर्गातील पदांसाठीच्या या परीक्षेसाठी राज्यभरातील जवळपास चार लाख ६६ हजारांपेक्षा जास्त उमेदवारांनी अर्ज भरला आहे. राज्यातील एकूण ३७ जिल्हा केंद्रांवर परीक्षा घेण्यात येईल. तर गट ब सेवा मुख्य परीक्षा मुख्य परीक्षा २ सप्टेंबरला आणि गट क सेवा मुख्य परीक्षा ९ सप्टेंबरला घेण्यात येणार आहे. या भरती प्रक्रियेत सहायक कक्ष अधिकारी, राज्य कर निरीक्षक, दुय्यम निबंधक, दुय्यम निरीक्षक राज्य उत्पादन शुल्क, तांत्रिक सहायक, कर सहायक, लिपीक-टंकलेखक अशा एकूण ८ हजार १६९ पदांसाठी भरती प्रक्रिया राबवली जाणार असल्याचे एमपीएससीने स्पष्ट केले आहे.

‘या’ विभागांमध्ये होणार भरती -

सामान्य प्रशासन विभाग - सहायक कक्ष अधिकारी - ७० पदे

महाराष्ट्र लोकसेवा आयोग - सहायक कक्ष अधिकारी - ८ पदे

वित्त विभाग -

१) राज्य कर निरीक्षक - १५९ पदे

२) तांत्रिक सहायक - १ पद

३) कर सहायक - ४६८ पदे

गृह विभाग -

१) पोलीस उपनिरीक्षक - ३७४ पदे,

२) दुय्यम निरीक्षक, राज्य उत्पादन शुल्क - ६ पदे

महसूल व वन विभाग - दुय्यम निबंधक (श्रेणी -१) किंवा मुद्रांक निरीक्षक - ४९ पदे

मंत्रालयीन प्रशासकीय विभाग तसेच राज्य शासनाची महाराष्ट्रातील विविध कार्यालये - लिपिक टंकलेखक - ७०३४ पदे