नवी दिल्ली : राष्ट्रीय संरक्षण प्रबोधिनीची (एनडीए) दारे महिलांसाठी खुली करणाऱ्या संरक्षण मंत्रालयाने यासाठीच्या प्रवेश परीक्षेची अधिसूचना पुढील वर्षी मे महिन्यात जारी करण्यात येईल अशी माहिती आज सर्वोच्च न्यायालयात दिली.

या प्रवेशासाठीच्या कालमर्यादेचा विचार करता त्यासाठी योग्य नियोजन आणि तयारी करणे गरजेचे असून त्यामाध्यमातून महिला उमेदवारांच्या प्रवेशाची प्रक्रिया अधिक सुलभपणे पार पडू शकेल, असे मंत्रालयाकडून सांगण्यात आले. याबाबतचे शपथपत्र आज केंद्र सरकारकडून सर्वोच्च न्यायालयात सादर करण्यात आले. एनडीएची प्रवेश परीक्षा ही वर्षातून दोनदा घेतली जाते, या परीक्षेच्या आयोजनासाठी योग्य यंत्रणेची उभारणी करण्यासाठी मे २०२२ पर्यंतची डेडलाईन निश्‍चित करण्यात आली. यूपीएससीला देखील अधिसूचना जारी करण्यासाठी तितका वेळ मिळणे गरजेचे असते. एनडीएमध्ये प्रवेश घेणाऱ्या महिला उमेदवारांसाठी सर्वसमावेशक अभ्यासक्रम तयार केला जाणार आहे.