पुणे - केंद्रीय विद्यालय संघठन यांच्या वतीने देशभरातील केंद्रीय विद्यालयांमधील इयत्ता पहिली ते बारावीच्या प्रवेशाची प्रक्रिया सुरू करण्यात आली आहे. इयत्ता पहिलीतील प्रवेशासाठी १५ एप्रिलपर्यंत ऑनलाइन नोंदणी करता येणार आहे. पहिलीसाठी ३१ मार्चपर्यंत बालकांचे किमान सहा वर्ष वय पूर्ण असणे अपेक्षित आहे, असे संघठनतर्फे स्पष्ट करण्यात आले आहे.

देशातील एक हजार २५४ केंद्रीय विद्यालयांमध्ये शैक्षणिक वर्ष २०२४-२५ मधील प्रवेशासाठी ही प्रक्रिया राबविण्यात येत आहे. केंद्रीय विद्यालयाच्या संघटनतर्फे पोर्टलद्वारे ही प्रवेश प्रक्रिया राबविण्यात येते. केंद्रीय विद्यालयातील इयत्ता पहिलीच्या प्रवेश प्रक्रियेतील ऑनलाइन नोंदणीला सोमवारपासून सुरू झाली असून ती १५ एप्रिलपर्यंत सुरू राहणार आहे. तर इयत्ता अकरावीची प्रवेश प्रक्रिया दहावीच्या निकाल लागल्यानंतर दहा दिवसांनी सुरू करण्यात येईल.

याबरोबरच बालवाटिकेतील (पूर्व प्राथमिक) प्रवेशाची प्रक्रिया देखील सुरू झाली आहे. इयत्ता पहिलीच्या प्रवेशाची प्रक्रिया ऑनलाइनद्वारे राबविण्यात येते. तर इयत्ता दुसरीपासून पुढील प्रवेश प्रक्रिया त्या-त्या केंद्रीय विद्यालयात उपलब्ध असणाऱ्या जागांनुसार प्रत्यक्ष राबविण्यात येते.

प्रवेश प्रक्रियेतील महत्त्वाच्या तारखा :

तपशील : कालावधी

- इयत्ता पहिलीसाठी ऑनलाइन नोंदणी : १५ एप्रिलपर्यंत

- इयत्ता पहिलीसाठी निवड आणि प्रतीक्षा यादी : पहिली तात्पुरती यादी- १९ एप्रिल, दुसरी तात्पुरती यादी- २९ एप्रिल आणि तिसरी तात्पुरती यादी- ८ मे

- इयत्ता पहिलीसाठी दुसरी नोटीस (गरज पडली तर) : ७ ते १५ मे

- इयत्ता दुसरी आणि पुढील इयत्तांसाठी : १० एप्रिलपर्यंत

‘केव्हीएस’ ॲप केलेली नोंदणी ठरणार अवैध

केंद्रीय विद्यालयांमध्ये इयत्ता पहिलीला प्रवेश मिळविण्यासाठी अनेक पालक ‘केव्हीएस मोबाईल ॲप’चा वापर करता आहे. या ॲपद्वारे पालक आपल्या पाल्याच्या इयत्ता पहिलीच्या प्रवेशासाठी ऑनलाइन नोंदणी करत असल्याचे दिसून येत आहे. परंतु, या ॲपद्वारे केलेली नोंदणी ही अवैध धरण्यात येईल. केंद्रीय विद्यालयातील इयत्ता पहिलीच्या प्रवेशासाठी केवळ ‘https: //kvsonlineadmission.kvs.gov.in/’ या पोर्टलवर केलेली ऑनलाइन नोंदणी ग्राह्य धरण्यात येईल, असे केंद्रीय विद्यालय संघठनने स्पष्ट केले आहे.

अधिक माहितीसाठी संकेतस्थळ -

- https://kvsangathan.nic.in/

- https://kvsonlineadmission.kvs.gov.in/