पुणे - राज्यात काही जिल्ह्यांमध्ये शुक्रवारी (ता.२६) अतिवृष्टी होईल, असा इशारा भारतीय हवामानशास्त्र विभागाने दिला आहे. त्यामुळे दहावी-बारावीच्या पुरवणी परीक्षेदरम्यान शुक्रवारी होणारे पेपर पुढे ढकलण्यात आले आहेत, अशी माहिती महाराष्ट्र राज्य माध्यमिक व उच्च माध्यमिक शिक्षण मंडळाने दिली आहे.

राज्य मंडळामार्फत जुलै-ऑगस्ट २०२४मध्ये घेण्यात येणारी दहावीची पुरवणी परीक्षा १६ ते ३० जुलै आणि बारावीची पुरवणी परीक्षा १६ जुलै ते ८ ऑगस्ट दरम्यान आयोजित केली आहे. या परीक्षेत शुक्रवारी (ता. २६) दहावीचा ‘विज्ञान आणि तंत्रज्ञान भाग दोन’ या विषयाचा पेपर सकाळी अकरा ते दुपारी एक या वेळेत होणार होता. आता हा पेपर ३१ जुलै रोजी सकाळी अकरा ते दुपारी एक यावेळेत होईल.

तर बारावीच्या परीक्षेतील वाणिज्य संघटन व व्यवस्थापन, अन्नशास्त्र व तंत्रज्ञान आणि एम.सी.व्ही.सी. पेपर दोन (ईबी टू एक्सबी= २०) विषयांचे पेपर शुक्रवारी सकाळी अकरा ते दुपारी दोन या वेळेत होणार होते. आता हे पेपर नऊ ऑगस्ट रोजी सकाळी अकरा ते दोन या वेळेत होणार आहेत.

दरम्यान, दहावी-बारावीच्या पुरवणी परीक्षेच्या लेखी आणि अन्य परीक्षेच्या उर्वरित वेळापत्रकामध्ये कोणताही बदल करण्यात आलेला नाही, असे राज्य मंडळाच्या सहसचिव मेधा निरफराके यांनी प्रकटनाद्वारे स्पष्ट केले आहे.

दहावी-बारावीच्या परीक्षेचे बदललेले वेळापत्रक पुढीलप्रमाणे -

इयत्ता : विषय : यापूर्वीची नियोजित वेळापत्रक : सुधारित वेळापत्रकाचा तपशील

दहावी : विज्ञान आणि तंत्रज्ञान भाग २ :  २६ जुलै (वेळ- सकाळी ११ ते दुपारी १) : ३१ जुलै (वेळ -सकाळी ११ ते दुपारी १)

बारावी : १. वाणिज्य संघटन व व्यवस्थापन, २. अन्नशास्त्र व तंत्रज्ञान, ३. एम.सी.व्ही.सी पेपर २ (ईबी टू एक्स बी=२०) : २६ जुलै (वेळ सकाळी ११ ते दुपारी २) : ९ ऑगस्ट (वेळ सकाळी ११ ते दुपारी २)