पुणे - शिक्षण हक्क कायद्यानुसार (आरटीई) (RTE) खासगी शाळांमधील (Private School) २५ टक्के राखीव जागांवरील प्रवेशासाठी (Admission) राबविण्यात येणाऱ्या प्रवेशाची सोडत (लॉटरी) (Draw) मार्चअखेरपर्यंत जाहीर होणार आहे. प्राथमिक शिक्षण संचालनालयामार्फत येत्या दोन दिवसांत अधिकृतपणे सोडत जाहीर करण्याची तारीख अंतिम केली जाणार आहे.

आरटीईनुसार आर्थिकदृष्ट्या दुर्बल आणि वंचित घटकातील विद्यार्थ्यांना खासगी शाळांमध्ये २५ टक्के जागा राखीव ठेवल्या जातात. या जागांवरील प्रवेशासाठी प्राथमिक शिक्षण संचालनालयामार्फत केंद्रीय पद्धतीने ऑनलाइन प्रवेश प्रक्रिया राबविण्यात येते. प्रवेश प्रक्रियेंतर्गत शैक्षणिक वर्ष २०२२-२३ करिता राज्यातील जवळपास ९ हजार ८८ शाळांमधील तब्बल एक लाख दोन हजार २२ जागांकरिता सुमारे दोन लाख ८२ हजार ७७६ अर्ज आले आहेत. प्रवेश प्रक्रियेमार्फत मुलांच्या प्रवेशासाठी यंदा मोठ्या प्रमाणात अर्ज दाखल झाले आहेत.

या प्रवेश प्रक्रियेला १६ फेब्रुवारीपासून सुरवात झाली. परंतु आरटीई पोर्टलवर पुणे जिल्ह्यातील शाळांची नोंदणी पूर्ण न झाल्याने जिल्ह्यातील प्रवेश प्रक्रिया फेब्रुवारीच्या चौथ्या आठवड्यात सुरू झाली. प्रवेश क्षमतेपेक्षा अधिक अर्ज आले आहेत. त्यामुळे आरटीई प्रवेशाच्या सोडतीकडे लाखो पालकांचे लक्ष लागले आहे.

विद्यार्थ्यांचा एकच अर्ज ग्राह्य धरणार

प्रवेश प्रक्रियेत अनेक पालकांनी विद्यार्थ्यांच्या प्रवेशासाठी एकापेक्षा अधिक अर्ज भरल्याचे दिसून आले. संपूर्ण राज्यात जवळपास तीन ते चार हजार ‘डुप्लिकेट’ अर्ज दाखल झाले आहेत. आता प्राथमिक शिक्षण विभागामार्फत डुप्लिकेट अर्ज केलेल्या विद्यार्थ्यांचा एक अर्ज ग्राह्य धरण्यात येणार असून उर्वरित अर्ज रद्द केले जातील. हे अर्ज रद्द करण्याची प्रक्रिया सुरू आहे, अशी माहिती प्राथमिक शिक्षण संचालक दिनकर टेमकर यांनी दिली.

‘आरटीई’नुसार खासगी शाळांमधील २५ टक्के राखीव जागांवरील प्रवेश प्रक्रियेंतर्गत सोडती जाहीर करण्याची तयारी अंतिम टप्प्यात आहे. शालेय शिक्षण विभागाकडून येत्या दोन दिवसांत सोडत काढण्याची तारीख जाहीर केली जाईल. मार्चअखेरपर्यंत सोडत जाहीर करण्यात येईल.

- दिनकर टेमकर, संचालक, प्राथमिक शिक्षण संचालनालय