पुणे : सावित्रीबाई फुले पुणे विद्यापीठाच्या उन्हाळी (मार्च-एप्रिल २०२४) सत्राच्या परीक्षा मंगळवारपासून सुरळीतपणे सुरू झाल्या आहेत. तसेच विद्यापीठाच्या मुक्त व दूरस्थ अध्ययनच्या बी.ए, बी.कॉम, एम.ए, एम.कॉम आणि एम.बी.ए. या अभ्यासक्रमांच्या एकूण १३ विषयांच्या परीक्षा ११ परीक्षा केंद्रावरून सकाळी आणि दुपारी सत्रात सुरू झाल्या आहेत.

तसेच विद्यापीठाच्या नियमित सर्व पदवी अभ्यासक्रमाच्या प्रथम वर्षाच्या प्रात्यक्षिक परीक्षाही सोमवारपासून सुरू झाल्या आहेत. दरम्यान, विविध अभ्यासक्रमांचे परीक्षा अर्ज भरू न शकलेल्या विद्यार्थ्यांना अखेरची संधी म्हणून बुधवारपर्यंत (ता.३) परीक्षा अर्ज ऑनलाइन पद्धतीने भरता येणार आहे. यानंतर कोणत्याही परिस्थितीमध्ये परीक्षा अर्ज भरून घेतला जाणार नाहीत.

महाविद्यालयांनी महाविद्यालय आणि संस्था स्तरावर असे परीक्षा अर्ज तपासून वैध अर्ज गुरुवारपर्यंत (ता. ४) इनवर्ड करण्यात यावेत. त्यासाठी कोणतीही मुदतवाढ दिली जाणार नाही. नियोजित वेळेत विद्यार्थ्यांनी परीक्षा अर्ज भरावेत, यासाठी महाविद्यालय स्तरावरून कार्यवाही करण्यात यावी, असे विद्यापीठाच्या परीक्षा व मूल्यमापन मंडळाचे संचालक डॉ. महेश काकडे यांनी सांगितले आहे.