मुंबई : पदव्युत्तर नीट परीक्षेसाठी नोंदणी करू इच्छिणाऱ्या विद्यार्थ्यांसाठी ही बातमी अतिशय महत्त्वाची आहे. राष्ट्रीय परीक्षा मंडळाने नीट नोंदणीबाबत महत्त्वाची सूचना प्रसिद्ध केली आहे.

पदव्युत्तर नीटसाठी आज दुपारी ३ वाजल्यापासून नोंदणी प्रक्रिया सुरू होणार होती; मात्र ही प्रक्रिया आजपासून सुरू होणार नसल्याचे परीक्षा मंडळाने प्रसिद्ध केलेल्या परिपत्रकात म्हटले आहे. (NEET PG 2023) हेही वाचा - ..तर तुम्हालाही मिळू शकेल इन्कमटॅक्सचा जुना रिफंड

पदव्युत्तर वैद्यकीय अभ्यासक्रमासाठी प्रवेश घेऊ इच्छिणाऱ्या विद्यार्थ्यांसाठी ५ मार्च २०२३ रोजी नीट परीक्षा आयोजित करण्यात आली आहे. त्यासाठी आजपासून म्हणजेच ५ जानेवारीला दुपारी ३ वाजल्यापासून नोंदणी प्रक्रिया सुरू होणार होती.

नोंदणी करण्यासाठी सकाळपासूनच विद्यार्थ्यांमध्ये उत्साह होता; मात्र परीक्षा मंडळाच्या एका परिपत्रकाने या उत्साहावर पाणी पडले. आजपासून सुरू होणारी नोंदणी प्रक्रिया स्थगित करण्यात आली असून पुढील तारीख लवकरच जाहीर करण्यात येईल, अशा आशयाचे परिपत्रक परीक्षा मंडळाने आपल्या संकेतस्थळावर प्रसिद्ध केले आहे.

प्रसिद्ध केलेल्या परिपत्रकात असेही नमूद करण्यात आले आहे की, नीट परीक्षेसाठी नोंदणी प्रक्रिया आजपासून सुरू होणार असलेल्या जाहिरातींकडे विद्यार्थ्यांनी दुर्लक्ष करावे. त्यामुळे आता परीक्षेच्या नोंदणीसाठी विद्यार्थ्यांना आणखी वाट पाहावी लागणार आहे.

दरवर्षी हजारो विद्यार्थी पदवी आणि पदव्युत्तर वैद्यकीय अभ्यासक्रमांना प्रवेश घेत असतात. या अभ्यासक्रमांच्या सरकारी व खासगी महाविद्यालयांमध्ये प्रवेश घेण्यासाठी नीट परीक्षेतील गुण ग्राह्य धरले जातात.

पदवी अभ्यासक्रमासाठी नीट परीक्षा अनिवार्य असते. तसेच पदवी अभ्यासक्रम पूर्ण केल्यानतंर पदव्युत्तर अभ्यासक्रमाला प्रवेश घेण्यासाठीही नीट परीक्षा अनिवार्य असते.

पदव्युत्तर अभ्यासक्रमासाठीची नीट परीक्षा यंदा मार्चमध्ये होणार आहे. त्यासाठीची नोंदणी प्रक्रिया ५ जानेवारीपासून सुरू होत असल्याच्या जाहिराती काही ठिकाणी प्रसिद्ध झाल्या होत्या; मात्र आज ही प्रक्रिया सुरू होणार नसल्याचे परीक्षा मंडळाने म्हटले आहे.