सोलापूर : केंद्रीय वायुसेना निवड मंडळाने (सेंट्रल एयरमैन सिलेक्‍शन बोर्ड) नुकतीच भारतीय वायुसेनेच्या एक्‍स आणि वाय समूहाच्या भरती परीक्षेच्या तारखांची घोषणा केली आहे. प्रसिद्ध झालेल्या माहितीनुसार, 18 ते 22 एप्रिल 2021 पर्यंत ही भरती परीक्षा विविध केंद्रांवर घेण्यात येणार आहे. या परीक्षेला बसणारे उमेदवार परीक्षेच्या 48 तास आधी अधिकृत वेबसाइटवर लॉग इन करून प्रवेशपत्र (ऍडमिट कार्ड) डाउनलोड करू शकतील, अशी माहिती मंडळाने जारी केली आहे. या पदांसाठी जानेवारी 2021 मध्ये अर्ज मागविण्यात आले होते. 

अशा प्रकारे केली जाईल उमेदवारांची निवड 
अधिसूचनेनुसार, या पदांची निवड ऑनलाइन परीक्षा, शारीरिक चाचणी व वैद्यकीय तपासणीनंतर केली जाईल. ऑनलाइन परीक्षा उत्तीर्ण होणाऱ्यांना पुढील भरती प्रक्रियेसाठी बोलविण्यात येईल. या तीन परीक्षा उत्तीर्ण झालेल्यांची या पदांसाठी निवड केली जाईल. 

प्रवेशपत्र डाउनलोड कसे कराल? 
परीक्षेसाठी अर्ज भरलेले उमेदवार भरती मंडळाच्या https://airmenselection.cdac.in/CASB च्या अधिकृत संकेतस्थळावर जाऊन त्यांचे प्रवेशपत्र डाउनलोड करू शकतात. यासाठी त्यांना त्यांचा नोंदणी क्रमांक आणि पासवर्ड प्रविष्ट करावा लागेल. या वेबसाइटवर त्यांना परीक्षेसंबंधी सविस्तर माहिती मिळेल. प्रवेशपत्र डाउनलोड केल्यानंतर उमेदवाराने त्यावर दिलेली मार्गदर्शक सूचना पूर्ण वाचली पाहिजे.