नवी दिल्ली : आम आदमी पार्टीने आगामी लोकसभा निवडणुकीसाठी पंजाबमधील ८ उमेदवारांची नावे घोषित केले आहे. यात विद्यमान खासदार सुशीलकुमार रिंकू (जालंधर) यांना पुन्हा उमेदवारी दिली आहे.

‘इंडिया’ आघाडीचा घटकपक्ष असलेल्या ‘आप’ने पंजाबमध्ये काँग्रेसशी आघाडी केलेली नाही. पंजाबमधील १३ जागांपैकी ८ उमेदवारांची यादी घोषित केली आहे. यात अमृतसरमधून कुलदीप सिंग धालीवाल, बठिंडा येथून गुरमित सिंग कुदियान, पतियाळा येथून डॉ. बलिबीर सिंग, फतेहगड साहिबमधून गुरुप्रित सिंग व संगरूरमधून गुरमित सिंग मीट हयर यांना उमेदवारी दिली आहे.

पंजाबमध्ये लोकसभेच्या तेरा जागा असून या सर्व जागांवर आम आदमी पक्ष स्वबळावर लढणार आहे. आप आणि काँग्रेसे पंजाबवगळता चंडीगड, हरियाना, दिल्ली, गुजरात आणि गोवा या ठिकाणी एकत्र लढत आहे. पंजाबमध्ये चौरंगी लढत पाहावयास मिळणार आहे. आम आदमी पक्ष, काँग्रेस, भाजप आणि अकाली दल यांच्यात कडवी लढत पाहावयास मिळणार आहे.