पुणे : पुणे जिल्हा सहकारी दूध उत्पादक संघाच्या (कात्रज डेअरी) संचालक मंडळाच्या १६ पैकी पाच जागा बिनविरोध झाल्या आहेत. उर्वरित अकरा जागांसाठी निवडणूक होणार असल्याचे स्पष्ट झाले आहे. या अकरा जागांसाठी येत्या २० मार्चला मतदान होणार आहे. बिनविरोध झालेल्यांमध्ये चार तालुकास्तरीय मतदारसंघ आणि अनुसूचित जाती-जमाती मतदारसंघातील एका उमेदवाराचा समावेश आहे.

उमेदवारी अर्ज माघारी घेण्याचा मंगळवारी शेवटचा दिवस होता. शेवटच्या दिवशी दौंड तालुकास्तरीय मतदारसंघातून राहुल दिवेकर आणि अनुसूचित जाती-जमाती मतदारसंघातील उमेदवार चंद्रकांत भिंगारे हे दोन उमेदवार बिनविरोध झाले आहेत. या दोघांच्या निवडीची अधिकृत घोषणा येत्या २१ मार्चला होणार आहे. याआधी तालुकास्तरीय मतदारसंघातील तीन उमेदवार बिनविरोध झाले आहेत. त्यामुळे अर्ज माघारीच्या शेवटच्या दिवसांपर्यंत एकूण पाच उमेदवार बिनविरोध झाले आहेत. याआधी बिनविरोध झालेल्यांमध्ये हवेली, पुरंदर आणि वेल्हे या तीन तालुकास्तरीय मतदारसंघातील उमेदवारांचा समावेश आहे.

दरम्यान, या निवडणुकीच्या रिंगणात शिल्ल्क राहिलेल्या उमेदवारांची संख्या आणि नावे उद्या (बुधवारी) सकाळी प्रसिद्ध केली जाणार असल्याचे या निवडणुकीचे निवडणूक निर्णय अधिकारी मिलिंद सोबले यांनी सांगितले. या निवडणुकीसाठी येत्या २० मार्चला मतदान होणार असून, मतदानानंतर लगेचच दुसऱ्या दिवशी म्हणजे २१ मार्चला मतमोजणी केली जाणार आहे. मतमोजणीनंतर लगेचच विजयी उमेदवारांची नावे जाहीर केली जाणार असल्याही सोबले यांनी यावेळी स्पष्ट केले.

जिल्ह्यातील बारामती व इंदापूर हे दोन तालुके वगळता उर्वरित अकरा तालुक्यांमध्ये प्रत्येकी एक तालुकास्तरीय मतदारसंघ आहे. या तालुकास्तरीय मतदारसंघाच्या अकरा, महिलांसाठीच्या दोन आणि नागरिकांचा मागास प्रवर्ग (ओबीसी), भटक्या जाती, विमुक्त जमाती (व्ही. जे. एन. टी.) आणि अनुसूचित जाती-जमाती प्रवर्गातील प्रत्येकी एका जागेचा समावेश आहे.

निवडणूक लागलेले मतदारसंघ

तालुकास्तरीय मतदारसंघ --- आंबेगाव, खेड, जुन्नर, भोर, मावळ, मुळशी आणि शिरूर (एकूण सात जागा).

महिला राखीव --- २ जागा

नागरिकांचा मागास प्रवर्ग --- १ जागा

भटक्या जाती-विमुक्त जमाती प्रवर्ग --- १ जागा