मुखेड: महायुती सरकारच्या कारभाराला येथील जनता कंटाळलेली आहेत यात सर्वात ज्यास्त शेतकरी, युवा त्रस्त आहे. निवडणूक डोळ्यासमोर ठेऊन महिलांना लाडली बहीण योजना सुरु केली पण येथील महिला जागृत आहेत त्यांनी महायुती सरकारचा चेहरा ओळखला आहे.

येत्या निवडणुकीत त्यांना त्यांची जागा दाखवतील शेतकऱ्यांच्या पीक विम्याचा विषय असेल दुष्काळाचे पैसे असतील त्याचबरोबर परवाच झालेल्या अतिवृष्टीने शेतकऱ्याच्या अतोनात नुकसान झाले आहे याचे आजपर्यंत पंचनामे होत नाहीत ही खंत माजी आमदार हणमंतराव पाटील बेटमोगरेकर यांनी व्यक्त केले.

शहरातील काँग्रेस कार्यालयात रविवारी ( ता २२)आयोजित पत्रकार परिषदेत माजी आमदार हणमंतराव पाटील बेटमोगरेकर बोलत होते यावेळी माजी जिल्हा परिषद अध्यक्ष दिलीप पाटील बेटमोगरेकर, तालुका अध्यक्ष राजू पाटील रावणगावकर, शहराध्यक्ष हणमंतराव नारनाळीकर, बाळासाहेब गोमारे, दिलीप कोडगिरे, शिवलिंग पाटील कामजळगेकर, विशंभर पाटील मसलगेकर, संदीप पाटील इटग्याळकर, बाळासाहेब पुंडे, संदिप पा. निवळीकर, दिनेश अप्पा आवडके, अभिजीत पाटील बेटमोगरेकर इत्यादी उपस्थित होते.

पुढे बोलताना बेटमोगरेकर म्हणाले की लोकसभा निवडणुकीमध्ये खासदार कै.वसंतराव चव्हाण यांना येथील मतदाराने भरघोस मतदान देऊन निवडून दिले यामुळे मी मतदारसंघातील १२२ गावात मतदारांचे आभार व संवाद यात्रा काढली होती.

येथील नागरिकांनी मला होऊ घातलेल्या विधानसभा निवडणुकीमध्ये माझी उमेदवारी ठेवण्यासाठी व माझ्या पाठीशी खंबीरपणे असल्याचे सांगितले त्यामुळे येत्या निवडणुकीत मी काँग्रेस पक्षाचा उमेदवार राहणार असून ही निवडणूक सर्व ताकतीनुसार लढवणार असल्याचे सांगितले तर येत्या २५ तारखेला शहरातील मातोश्री मंगल कार्यालयात शोक सभेचे आयोजन करण्यात आले असल्याची माहिती देण्यात आली यावेळी तालुक्यातील प्रमुख पदाधिकारी कार्यकर्ते मोठ्या संख्येने उपस्थित होते.

#ElectionWithSakal