बेळगाव : महाराष्ट्रातील विधानसभा निवडणुकीमध्ये (Assembly Elections) कोणत्याही राजकीय पक्षाशी हातमिळवणी करणार नाही, तर स्वतंत्रपणे सर्व जागांवर निवडणूक लढविणार आहे. याबाबत नियोजन सुरू असून लवकरच ठोस निर्णय घेतला जाणार असल्याचे स्वाभिमानी शेतकरी संघटनेचे अध्यक्ष माजी खासदार राजू शेट्टी (Raju Shetti) यांनी सांगितले.

ऊस गाळप हंगाम (Sugarcane Season) सुरू करण्यापूर्वी उसाचा भाव जाहीर करण्यात यावा, या मागणीसाठी बेळगाव जिल्ह्यातील शेतकरी संघटनांकडून सोमवारी (ता. १४) मोर्चाचे आयोजन करण्यात आले होते. यावेळी माजी खासदार राजू शेट्टी पत्रकारांशी बोलत होते. #ElectionWithSakal

महायुती आणि महाविकास आघाडी (Mahavikas Aghadi) पक्ष जरी वेगवेगळे असले तरी त्यांचे धोरण एकच आहे. आगामी विधानसभा निवडणुकीत स्वाभिमानी शेतकरी संघटना स्वतंत्रपणे निवडणूक लढविणार आहे. यासाठी ‘परिवर्तन महाशक्ती’च्या नावाखाली राज्यातील छोटे पक्ष एकत्रित करून संघटना बळकट करण्यात येणार आहे.

माजी राज्यमंत्री बाबा सिद्दिकी यांची झालेली हत्या अत्यंत दुर्दैवी आहे. राज्यातील कायदा-सुव्यवस्था पूर्णपणे कोलमडली आहे. सुरक्षारक्षकांच्या गराड्यात असणाऱ्या नेत्याची हत्या केली जात असेल तर सर्वसामान्यांचे रक्षण हे सरकार काय करणार, असा सवालही त्यांनी उपस्थित केला.