अमित शाह यांच्या वक्तव्यावर राज्याचे माजी मुख्यमंत्री आणि काँग्रेस नेते हरीश रावत (Harish Rawat) यांनी पलटवार केला असून, शाह यांनी त्यांना कुत्रा म्हटले तरी ते त्यांच्यासाठी आदरणीय आहेत, असे म्हटले आहे. यासोबतच रावत यांनी पंतप्रधान मोदी (PM Modi) आणि मुख्यमंत्री योगी (CM Yogi Adityanath) यांचेही त्यांच्या वक्तव्याबद्दल आभार मानले आहेत.

एका वृत्तवाहिनीच्या मुलाखतीत हरीश रावत यांना अमित शहांच्या 'धोबी'वरून केलेल्या वक्तव्यावर प्रश्न विचारला असता ते म्हणाले की, ''गृहमंत्री त्यांची संस्कृती दाखवत आहेत. शहा यांनी ''धोबी का...'' म्हटलं. पुढे कुत्रा म्हटल नाही. त्यांनी कुत्रा म्हटलं असतं तरी ते स्वतःची संस्कृती यातून दाखवून देतात. आमची संस्कृती ही नाही. माझ्यासाठी पंतप्राधन मोदी आणि अमित शाह दोघेही आदरणीय आहेत.''

अमित शाह जर कुत्रा म्हणत असतील तर हा कुत्रा उत्तराखंडचा चौकीदार आहे. उत्तराखंडच्या जनतेवर काही वार झाला तर तो सिंहासारखा कधी तुमच्यावर वार करेल सांगता येत नाही. मी भूंकेन आणि वेळ आली तर चावणार सुद्धा, असा थेट इशारा हरिश रावत यांनी अमित शाह यांना दिला आहे. इथं येणारे भाजपचे प्रत्येक नेते हरिश रावत यांच्या दोन-चार टीका करतात. यामध्ये गृहमंत्री अमित शाह, पंतप्रधान मोदी, शिवराजसिंह चौहान, मुख्यमंत्री योगी आदित्यनाथ यांचा समावेश आहे. पण, मी लोकशाहीचा पाईक आहे. त्यामुळे या प्रत्येकाचे आभार मानतो, असंही रावत म्हणाले.

एका निवडणूक रॅलीत गृहमंत्री अमित शाह यांनी हरीश रावत यांच्यावर निशाणा साधला होता. ''धोबी का...ना घर का, ना घाट का?'' असं अमित शाह म्हणाले होते. त्यानंतर उत्तराखंडचे राजकारण तापले असून काँग्रेस नेते अमित शाह यांच्यावर हल्लाबोल करत आहेत.