Sonia Gandhi : पाच राज्यांच्या निवडणुकीच्या प्रचारापासून दूर राहिलेल्या काँग्रेस नेत्या सोनिया गांधी उद्या (ता. २८) हैदराबादमध्ये प्रचारात उतरणार आहेत. त्या हैदराबादमध्ये रोड शो करणार असून यावेळी काँग्रेस नेते राहुल गांधी सोबत राहणार आहेत.

गेल्या काही वर्षांपासून काँग्रेस संसदीय दलाच्या नेत्या सोनिया गांधी प्रकृतीच्या कारणामुळे प्रचारात भाग घेत नाहीत. परंतु तेलंगण राज्याच्या निर्मितीमध्ये प्रमुख भूमिका असल्याने सोनिया गांधी यांनी यावेळी एक दिवस तरी प्रचारात सहभाग घ्यावा, अशी विनंती तेलंगण प्रदेश काँग्रेस समितीतर्फे करण्यात आली होती. तेलंगणात काँग्रेसला बहुमत मिळण्याची आशा असल्याने प्रचारात कोणतीही कमतरता राहू नये, यासाठी काँग्रेसतर्फे सर्व प्रयत्न केले जात आहे. यानुसार सोनिया गांधी यांचा उद्या, मंगळवारी रोड शो आयोजित केला आहे.

तेलंगणामध्ये येत्या ३० नोव्हेंबरला मतदान होणार असून उद्या सायंकाळी प्रचार संपणार आहे. सोनिया गांधी यांनी मिझोरामच्या निवडणुकीसाठी एक व्हिडीओद्वारे मतदारांना काँग्रेसला मतदान करण्याचे आवाहन केले होते. तसेच त्यांनी छत्तीसगड, मध्यप्रदेश व राजस्थानमध्ये सुद्धा व्हिडिओ संदेश देऊन मतदारांना काँग्रेसला मतदान करण्याचे आवाहन केले होते. परंतु तेलंगणात त्या रोड शोमध्ये सहभागी होणार आहेत. पाच राज्यांच्या निवडणुकीचा हा अखेरचा टप्पा आहे.