नवी दिल्ली : तेलंगणमधील २३ टक्के उमेदवारांवर विविध स्वरुपाचे गुन्हे दाखल असल्याची माहिती असोसिएशन फॉर डेमोक्रॅटिक रिफॉर्म्स (एडीआर) संस्थेकडून आज देण्यात आली. दरम्यान एकूण उमेदवारांपैकी २५ टक्के उमेदवार कोट्यधीश असल्याचेही ‘एडीआर’ने अहवालात नमूद केले आहे.

येत्या ३० तारखेला तेलंगणमध्ये ११९ जागांसाठी मतदान होत असून त्यासाठी २ हजार २९० उमेदवार रिंगणात आहेत. यातील २३ टक्के उमेदवारांवर कोणत्या ना कोणत्या स्वरुपाचे गुन्हे दाखल आहेत. विशेष म्हणजे काँग्रेसच्या ७२ टक्के उमेदवारांवर गुन्हे दाखल असून यातील ५१ टक्के गुन्हे गंभीर प्रकारचे आहेत. दुसरीकडे भाजपच्या ७१ टक्के उमेदवारांवर गुन्हे दाखल असून यातील ४९ टक्के गुन्हे गंभीर प्रकारचे आहेत. २०१८ च्या निवडणुकीवेळी गंभीर गुन्हे दाखल असलेल्या उमेदवारांचे प्रमाण १३ टक्के इतके होते.

यावेळी ते वाढून १५ टक्क्यांवर पोचले आहे. गंभीर गुन्ह्यांमध्ये हत्येचे सात गुन्हे, हत्येचा प्रयत्न केल्याचे २७ गुन्हे तर महिलांविरोधात अत्याचार केल्याचे ४५ गुन्हे दाखल आहेत. २०१८च्या निवडणुकीमध्ये कोट्यधीश उमेदवारांचे प्रमाण २५ टक्के इतके होते. यावेळी निवडणुकीत हे प्रमाण तितकेच आहे. सर्व उमेदवारांच्या संपत्तीची सरासरी ४.७१ कोटी रुपये इतकी आहे. विशेष म्हणजे ४१.४८ टक्के उमेदवारांची संपत्ती दहा लाख रुपयांपेक्षा कमी आहे.