लोकांना नाश्ता म्हणून पोहे खूप आवडतात. अनेक ठिकाणी पोहे स्ट्रीट फूड म्हणूनही प्रसिद्ध आहेत. पोहेही घरीच तयार करून खाल्ले जातात. जर तुम्हालाही पोहे खायला आवडत असतील आणि पोह्यांचे वेगळे प्रकार ट्राय करायचे असतील तर आज आम्ही तुम्हाला कॉर्न पोहे बनवण्याची सोपी रेसिपी सांगणार आहोत.

कॉर्न पोहे बनवण्यासाठी पोह्यासोबत कॉर्नचा वापर केला जातो. ब्रेकफास्टशिवाय कॉर्न पोहे दिवसभरात केव्हाही बनवून खाऊ शकतात. मुलांनाही ही फूड डिश खूप आवडते. जर तुम्हाला ही रेसिपी घरी करून पहायची असेल, तर तुम्ही आम्ही दिलेल्या पद्धतीनुसार स्वादिष्ट कॉर्न पोहे तयार करू शकता.

लागणारे साहित्य

• 100 ग्रॅम पोहे

• 1 बारीक चिरलेला कांदा

• 1/2 वाटी उकडलेले स्वीट कॉर्न

• 2 पळी तेल

• 1/2 चमचा हळद

• 2 चिरलेल्या हिरव्या मिरच्या

• 1 चमचा साखर

• 1/2 चमचा मोहरी

• कडीपत्ता 1 काडी

• लिंबू

• चवी नुसार मीठ

• कोंथिबीर

• ओल्या नारळाचा किस

कृती

एका चाळणीत पोहे काढून स्वच्छ चाळून घ्या; त्यावर हळू हळू पाणी घालून ते ओले करून घ्या. पोहे जास्त ओले करू नका नाहीतर त्याचा लगदा होईल

कढई मध्ये 2 पळी तेल घाला; तेल गरम झाल्यावर त्यात मोहरी घाला, मोहरी छान तडतडली की त्यात हिंग आणि शेंगदाणे घाला; शेंगदाणे शिजायला वेळ लागतो त्यामुळे ते आधी टाकावे.

आता त्यात मिरची, कडीपत्ता, हलक्या फ्लेवर साठी थोडीशी कोथिंबीर आणि कांदा घाला; कांदा लालसर झाला की त्यात उकडलेले कॉर्न घाला.

सगळ छान परतवून त्यात हळद घाला आणि मग पोहे; सगळं व्यवस्थित परतवून घ्या. आता त्यात चवीपुरता साखर आणि मीठ घालुन छान मिक्स करा; आणि अगदी दोन मिनिटं वाफ भरण्यासाठी झाकण ठेवा.

वाफ भरली, पोहे शिजले की गॅस बंद करा सर्व्हिंग प्लेटमध्ये काढून त्यावर ओल्या नारळाचा किस, कोथिंबीर घाला, बाजूला लिंबाची फोड ठेवा आणि सर्व्ह करा.

गरमागरम कॉर्न पोहे तयार आहेत.