महाराष्ट्रातील स्वर्ग म्हणजे कोकण (konkan). निसर्गरम्य वातावरण आणि तेथील खाद्यसंस्कृती कायमच पर्यटक आणि खवय्यांचं लक्ष वेधून घेत असते. कोकणातील कोकम, आंबे, फणस, काजू हा रानमेवा पार सातासमुद्रापार लोकप्रिय आहे. यातही काजूला प्रचंड मागणी असून भाजलेले काजू, ओले काजू हे विशेष प्रसिद्ध. त्यामुळे जर तुम्ही कोकणात गेलास आणि काजीची भाजी नाय खाल्लास तर तुमचा कोकणदर्शन व्यर्थ आसा. थोडक्यात, सांगायचं झालं तर कोकणात जाऊन तुम्ही ओल्या काजूची भाजी (dry Kaju Masala) खाल्ली नाही. तर, तुमचं कोकणदर्शन व्यर्थ आहे. परंतु, सध्याच्या काळात आपल्याला कोकणात जाणं तर शक्य नाही. पण, कोकणातली ही भाजी आपल्या डायनिंग टेबलवर नक्कीच येऊ शकते. कशी काय? तर अहो, ही भाजी घरीच कशी करायची ते जाणून घेऊयात. (Delicious-village-Style-dry-Kaju-Masala-with-ingredients )

साहित्य -

ओले काजू - २ वाटी

बटाटा - १

हिरवी मिरची - २

ओलं खोबरं - पाव वाटी

फोडणीचं साहित्य

मीठ - चवीनुसार.

कृती -

प्रथम ओल्या काजूचा गर सोलून घ्या. ( हिरव्या सालांमधील ओला काजू काढून घ्या.) त्यानंतर हे काजू गर १० मिनीटे गरम पाण्यात भिजवून ठेवा. त्यामुळे त्यांना असलेला डिंक निघतो. १० मिनिटांनंतर हे काजू साध्या पाण्याने धुवून घ्या. काजू धुवून झाल्यानंतर गॅसवर कढई ठेऊन त्यात तेल गरम करुन घ्या. या गरम तेलात मोहरी, जिरं, कढीपत्ता, हिरव्या मिरच्या घाला. त्यानंतर त्यात बटाटा बारीक चिरून घाला व बटाट्यांना एक वाफ येऊ द्या. बटाटे एका वाफेत शिजल्यावर त्यात स्वच्छ धुतलेले काजू घाला. या भाजीत चवीपुरतं मीठ घालून पुन्हा एक वाफ काढा. परंतु, काजू जास्त शिजणार नाहीत याची काळजी घ्या. त्यानंतर तयार भाजीवर ओलं खोबरं घाला अशा प्रकारे ओल्या काजूची सुकी भाजी तयार.