सर्व सणसमारंभ आपल्या देशामध्ये उत्साहात साजरे केले जातात. उत्सव धुमधडाक्यात साजरे करण्यासोबतच प्रत्येक घराघरामध्ये वेगवेगळ्या प्रकारच्या पक्वान्नांचीही चव चाखायला मिळते. यापैकीच एक लोकप्रिय पदार्थ म्हणजे 'करंजी'.

दिवाळीसह अन्य उत्सवांमध्ये हा खुशखुशीत गोड पदार्थ तयार केला जातो. मैदा किंवा गव्हाच्या पिठापासून करंजी तयार केली जाते. चला तर जाणून घेऊया सुक्या खोबऱ्याची खुशखुशीत करंजीची सोपी रेसिपी.

लागणारे साहित्य:

- मैदा अर्धा किलो

- मीठ अर्धा चमचा

- तुपाचे किंवा रिफाईंड तेलाचे मोहन आठ चमचे

- सुक्या खोबऱ्याचा कीस तीन वाट्या

- पिठीसाखर दोन वाट्या

- खसखस तीन-चार चमचे

- कणीक पाव वाटी

- वेलची पूड एक चमचा

- तळण्यासाठी तूप वा रिफाईंड तेल

बनवण्याची पद्धत

सुरवातीला खोबऱ्याचा किस तयार करुन घ्या. त्यानंतर गार झाल्यावर हाताने कुसकरून अथवा मिक्सरमध्ये थोडासा बारीक करून घ्या.

नंतर खसखस भाजून पूड करा. तसेच कणीक भाजून घ्या. नंतर खोबऱ्याचा कीस, खसखस पूड, भाजलेली कणीक, पिठीसाखर आणि वेलची पूड एकत्र करून सारण तयार करा.

मीठ व तुपाचे मोहन घालून मैदा घट्ट भिजवा. नंतर त्याच्या लहान-लहान पुऱ्या लाटून त्यात सारण भरा. त्याला करंजीच्या आकारात दुमडून त्याचे (कड कापून) तुपात वा तेलात तळून कागदावर पसरून ठेवा.

करंजी गार झाल्यावर डब्यात भरून ठेवा. अशा पद्धतीने सुक्या खोबऱ्याच्या खुशखुशीत करंज्या तयार झाल्या आहेत.