Diwali Recipe 2023 : दिवाळी म्हणजे दिव्यांचा, आनंदाचा आणि प्रकाशाचा सण होय. दिवाळीमध्ये फराळ, मिठाई आणि विविध खाद्यपदार्थांची मेजवानी असते. घरोघरी गोडाधोडाचे पदार्थ आणि फराळाचे पदार्थ आवर्जून बनवले जातात.

यंदाची दिवाळी अवघ्या ५ दिवसांवर येऊन ठेपली आहे. त्यामुळे, सर्वत्र दिवाळीची लगबग पहायला मिळत आहे. या दिवाळीला तुम्हाला जर काही चटपटीत आणि खुसखुशीत खायची इच्छा असेल तर चटपटीत मेथी पापडी नक्की ट्राय करा. या मेथी पापडीची रेसिपी एकदम सोपी आहे. चला तर मग जाणून घेऊयात या मेथी पापडीची रेसिपी.

मेथी पापडी करण्यासाठी लागणारे साहित्य खालीलप्रमाणे

• २०० ग्रॅम मैदा

• १५० ग्रॅम बेसन

• कसूरी मेथी – १ चमचा

• ४-५ हिरव्या मिरच्या

• आलं

• कोथिंबीर

• १ चमचा ओवा

• चवीनुसार मीठ

• तेल

मेथी पापडी करण्याची पद्धत खालीलप्रमाणे

• सर्वात आधी एका बाऊलमध्ये बेसन आणि मैदा काढून घ्या.

• हे दोन्ही घटक एकत्र करून त्यामध्ये कसूरी मेथी, मीठ आणि ओवा घाला.

• आता हे सर्व घटक चांगल्या प्रकारे मिक्स करा आणि त्यामध्ये तेल घाला.

• तेलाच्या मदतीने हे सर्व पीठ चांगल्या प्रकारे मळून घ्या.

• तुम्हाला हवे असल्यास या पीठामध्ये हिरव्या मिरच्या, कोथिंबीर आणि आल्याची एकत्रित पेस्ट तुम्ही यामध्ये घालू शकता.

• आता या पीठाचे गोळे तयार करून लाटून घ्या.

• यानंतर, कढईत तेल घालून ते गरम करायला ठेवा.

• तेल गरम झाल्यानंतर त्यामध्ये या लाटलेल्या मेथीच्या पुऱ्या तळून घ्या.

• या पुऱ्या सोनेरी होईपर्यंत तळून घ्या.

• आता, तुमची मसालेदार आणि चटपटीत मेथी पापडी तयार आहे.

• टोमॅटो सॉस, पुदिना चटणी किंवा गरमागरम चहासोबत तुम्ही ही मेथी पापडी खाऊ शकता.