Gudi Padwa 2024 : अवघ्या २ दिवसांवर गुढीपाडव्याचा सण येऊन ठेपला आहे. त्यामुळे, सगळीकडे गुढीपाडव्याची धामधूम पहायला मिळत आहे. गुढीसाठी लागणारे साहित्य, साखरेच्या गाठी, रेशमी कापड इत्यादी गोष्टींमुळे बाजारपेठा सजल्या आहेत. गुढीपाडव्याचा सण महाराष्ट्रात मोठ्या थाटामाटात आणि उत्साहात साजरा केला जातो.

यंदा हा गुढीपाडवा ९ एप्रिलला (मंगळवारी) साजरा केला जाणार आहे. गुढीपाडव्याच्या दिवशी गोडाधोडाचा नैवेद्य बनवला जातो. या दिवशी खास गोड पदार्थ बनवले जातात. श्रीखंड पुरी, खीर आणि बासुंदीचा देखील बेत आखला जातो. या गुढीपाडव्याला जर तुम्ही देखील बासुंदी बनवण्याचा विचार करत असाल तर हा लेख शेवटपर्यंत वाचा. आज आम्ही तुम्हाला बासुंदी बनवण्याची सोपी रेसिपी सांगणार आहोत.

बासुंदी बनवण्यासाठी लागणारे साहित्य :

• दूध - १ लिटर

• साखर – १ वाटीभर

• वेलची पावडर - ¼ चमचा

• बदाम, पिस्ता, केशर सजावटीसाठी

बासुंदी बनवण्याची योग्य पद्धत खालीलप्रमाणे :

• घरच्या घरी स्वादिष्ट बासुंदी बनवण्यासाठी सर्वात आधी गॅसवर एका खोलगट पातेल्यात किंवा खोलगट पॅनमध्ये दूध टाका.

• आता हे दूध चांगले उकळू द्या.

• जोपर्यंत हे दूध निम्मे होत नाही. तोपर्यंत, हे दूध चमच्याच्या मदतीने ढवळत राहा.

• दूध निम्मे आटल्यानंतर, त्यामध्ये वेलची पावडर आणि साखर घालून मध्यम आचेवर १० मिनिटे शिजू द्या.

• हे मिश्रण चांगले शिजल्यानंतर एका भांड्यात बासुंदी काढून घ्या.

• तुमची गरमागरम बासुंदी तयार आहे.

• या बासुंदीमध्ये आता बदाम आणि पिस्त्याचे काप घालून ती सजवा.

• केशरच्या मदतीने ही तुम्ही बासुंदी सजवू शकता.

• बासुंदी थंड झाल्यावर खायला द्या.