पालेभाज्या म्हटंल की अनेकजण नाक मुरडतात. मेथी, शेपू, चाकवत, पालक, पोकळा या भाज्यांना बरेचजण नापंसद करतात. हे खाताना अनेक कारण आणि नखरे तयार असतात. पावसाळा सुरु झाला की, विविध रानभाजांची मायंदाळी सुरु होते. यात चवळी, पातर, शेवगा, शेंडवल, कुरुड, घोळ अशा अनेक भाज्यांची नावे आपण ऐकली असाल. यातच श्रावण महिन्यात रेलचेल असणारी एक पालेभाजी म्हणजे, भोपळ्याच्या पानांची भाजी. एक वेलवर्गीय भाजी म्हणून याकडे पाहिले जाते. ही एक सोपी आणि कमी कालावधीत तयार होणारी भाजी आहे. ती स्वादिष्ट तर आहेच शिवाय या हंगामात शरीरासाठी उपयुक्तही आहे. या सोप्या रेसिपीविषयी आपण आज जाणून घेणार आहोत.

साहित्य -

• भोपळ्याची पाने - १५ ते २०

• भिजवलेली तुर डाळ - पाव वाटी

• भिजवलेली तांदळाची कणी - पाव वाटी

• बारिक चिरलेली मिरची - ४

• बारिक चिरलेला कांदा - ४

• तेल - आवश्यकतेनुसार

• मीठ - आवश्यकतेनुसार

• शेंगदाण्याचा कूट - आवश्यकतेनुसार

कृती -

सुरुवातीला भोपळ्याची पाने स्वच्छ धुवून घ्यावी. वेलीवरुन ही पाने काढताना त्याचे देठ शक्यतो मोठे ठेवावे. त्यानंतर पाने उभी धरुन मागच्या बाजूने पानाच्या दाठावरुन खाली ओढत त्या पानाच्या शिरा काढून टाकाव्या. शिरा काढून झाल्या की, भाजी बारिक चिरुन घ्यावी. आता कढईत तेल गरम करायला ठेवावे. यानंतर त्यात कांदा आणि बारिक चिरलेली मिरची घालून भाजून घ्यावे. या मिश्रणात भाजलेल्या शेंगदाण्याचा (थोडा मोठा) कूट घालावा. मिश्रण हलवत रहावे. जेणेकरुण ते करपणार नाही. या मिश्रणात भिजवलेली तांदळाची कणी आणि तुर डाळ घालावी. शेवटी यात मीठ घालून या मिश्रणात थोडे पाणी घालावे. मंद आचेवर आणिवाफेवर ही भाजी शिजवू द्यावी. हिरव्यागार रंगाची तुमची भोपळ्यच्या पानांची भाजी तयार आहे. गरमा गरम भाकरीसोबत तुम्ही ही भोपळ्याची भाजी सर्व्ह करु शकता.