Healthy Breakfast Recipe : सकाळच्या नाश्त्यामध्ये रोज काय करावे? असा प्रश्न अनेकांना पडतो. बरं रोज ते पोहे, उपमा, शिरा, दाक्षिणात्य पदार्थ आणि पराठे खाऊन कंटाळा आलेला असतो. या थंडीच्या दिवसांमध्ये काहीतरी टेस्टी आणि हेल्दी खावे असे प्रत्येकाला वाटते.

थंडीच्या दिवसांमध्ये अंडी खाण्याचा आवर्जून सल्ला दिला जातो. मात्र, अंड्याचे ऑम्लेट करण्याव्यतिरिक्त आणखी वेगळी रेसिपी काय करणार?  असा प्रश्न अनेकांना पडतो. मात्र, आता तुमच्यासाठी अंड्याची एक वेगळी ब्रेकफास्ट रेसिपी आज आम्ही घेऊन आलो आहोत. या रेसिपीचे नाव आहे अंडा पराठा. हा पराठा करायला ही अतिशय सोपा आहे. चला तर मग जाणून घेऊयात अंडा पराठ्याची रेसिपी.

अंडा पराठा बनवण्यासाठी लागणारे साहित्य :

• ३-४ अंडी

• ४-५ हिरव्या मिरच्या

• ५०० ग्रॅम गव्हाचे पीठ

• बारीक चिरलेली कोथिंबीर

• तेल

• १ कांदा बारीक चिरलेला

• चवीनुसार मीठ

अंडा पराठा बनवण्याची योग्य पद्धत

• अंडा पराठा बनवण्यासाठी सर्वात आधी एका भांड्यात किंवा परातीमध्ये गव्हाचे पीठ घ्या.

• त्यात मीठ आणि तेल मिसळून चांगली कणीक मळून घ्या.

• आता दुसऱ्या एका बाऊलमध्ये ३-४ अंडी फेटून घ्या. या मिश्रणात बारीक चिरलेला कांदा, हिरवी मिरची आणि कोथिंबीर मिसळा.

• आता हे सर्व मिश्रण चांगल्या प्रकारे फेटून घ्या.

• एका बाजूला गॅसवर एक पॅन गरम करायला ठेवा. हा पॅन गरम होईपर्यंत मळलेल्या कणीकचे बारीक गोळे बनवून घ्या.

• त्यानंतर, हे गोळे लाटून घ्या. आता ही लाटलेली चपाती तव्यावर दोन्ही बाजूंनी तेल लावून हलकी भाजून घ्या.

• त्यानंतर, या चपातीच्या एका बाजूला अंड्याचे मिश्रण हलक्या हाताने पसरवून घ्या.

• त्यानंतर, हे अंड्याचे मिश्रण शिजेपर्यंत चपाती चांगली भाजून घ्या. तुमचा स्वादिष्ट अंडा पराठा तयार आहे.

• हा गरम पराठा तुम्ही लोणच्यसोबत किंवा सॉससोबत खाऊ शकता.