मालवणी पद्धतीचं जेवण तेव्हाच पूर्ण होतं ज्यावेळी पानात थंडगार सोलकढी असते. ओल्या नारळाचा चव वापरुन केलेली ही सोलकढी आज अनेक जण आवडीने पितात. विशेष म्हणजे आजकाल कोणत्याही हॉटेल, रेस्टॉरंटमध्ये सोलकढी सहज मिळते. परंतु, अनेक जण त्यांच्या सोयीनुसार या सोलकढीच्या चवीत बदल करत असतात. त्यामुळे अद्यापही कित्येकांना अस्सल मालवणी पद्धतीची सोलकढी कशी असते हे माहित नाही. म्हणूनच, मालवणी स्टाइल सोलकढी कशी करावी ते पाहुयात. (How-To- Make-malvani-style-SolKadhi-kokum-curry-ssj93)

साहित्य -

कोकम आगळ - अर्धी वाटी

खवलेला ओला नारळ

लसूण पाकळ्या - ५ ते ६

हिरव्या मिरच्या - २

आलं - अर्धा इंच

मीठ व साखर - चवीनुसार

कोथिंबीर - अर्धा वाटी बारीक चिरलेली

पाणी - आवश्यकतेनुसार.

कृती -

प्रथम आमसुले १ तास कोमट पाण्यात भिजत ठेवा. ( शक्यतो कोकम ताजीच घ्यावीत त्यामुळे सोलकढीला रंग येतो) आमसुले भिजत असताना दुसरीकडे मिक्सच्या भांड्यात खोवलेला ओला नारळ, मिरच्या, लसूण पाकळ्या, आलं (आवड असल्यास), मीठ व साखर घालून छान बारीक पेस्ट करुन घ्या. ही पेस्ट करत असताना नारळातून दूध निघत असतं. पेस्ट करत असताना मध्ये मध्ये थोडं पाणी घाला ज्यामुळे नारळाचं दूध छान पातळसर होईल. त्यानंतर एका पातेल्यावर पातळ सुती कापड किंवा चाळणी ठेवा व नारळाचं दूध गाळून घ्या. जर दूध कमी झाल असेल तर पुन्हा मिक्सच्या भांड्यात थोडं पाणी घालून खोबऱ्याची पुन्हा बारीक पेस्ट करा व दूध काढा. त्यानंतर या नारळाच्या दुधात कोकम आगळ घाला व छान रंग येईपर्यंत नीट ढवळून घ्या. वर छान कोथिंबीर घाला. (कोकम आगळ चवीला प्रचंड आंबट असतो त्यामुळे तुमच्या आवडीनुसार त्याच प्रमाण घ्या.)

टीप -

१. कोकम आगळ नसेल तर आमसुले (कोकम) १ तास गरम पाण्यात भिजवून ठेवा. त्यानंतर त्याची पाणी घालून पेस्ट करा. व चाळणीच्या सहाय्याने नारळाच्या दुधात गाळून घाला.

२. नारळाचं दूध काढल्यानंतर शिल्लक असलेला नारळाचा चव टाकून न देता त्याचा वापर कोणत्याही मसालेदार भाजीचं वाटण करण्यासाठी करता येऊ शकतो.