Moong Dal Paratha : जर तुम्हाला दिवसाची सुरूवात ही हेल्दी आणि टेस्टी खाऊन करायची असेल तर मूग डाळीपासून बनवलेले पराठे हा एक बेस्ट ऑप्शन असू शकतो. हिवाळ्यात अनेकांना नाश्त्यामध्ये पराठे खायला आवडतात. बर नेहमीचे नाश्त्याचे तेच तेच पदार्थ खाऊन कंटाळा येतो.

जर तुम्ही देखील या पदार्थांसोबत बटाट्याचा, कोबीचा किंवा पनीर पराठा खाऊन कंटाळला असाल तर आज आम्ही तुमच्यासाठी एक खास रेसिपी घेऊन आलो आहोत. या खास रेसिपीचे नाव आहे मूग डाळ पराठा. चला तर मग जाणून घेऊयात, या टेस्टी आणि हेल्दी रेसिपीबद्दल.

मूग डाळ पराठा करण्यासाठी लागणारे साहित्य :

• गव्हाचे पीठ – २ वाट्या

• मूग डाळ – १ वाटी

• हळद – अर्धा चमचा

• धना पावडर – १ चमचा

• गरम मसाला – अर्धा चमचा

• हिंग – अर्धा चमचा

• लाल तिखट – १ चमचा

• तेल

• २-३ हिरव्या मिरच्या

• मीठ चवीनुसार

मूग डाळ पराठा बनवण्याची योग्य पद्धत खालीलप्रमाणे :

• चविष्ट मूगडाळ पराठा बनवण्यासाठी सर्वात आधी मूग डाळ स्वच्छ धुवा.

• त्यानंतर, ३-४ तास पाण्यात भिजत ठेवा.

• त्यानंतर, डाळ पाण्यातून काढून घ्या आणि मिक्सरमध्ये बारीक करा. आता ही मूग डाळीची बारीक पेस्ट एका भांड्यात काढून घ्या.

• आता एका ताटात किंवा परातीमध्ये गव्हाचे पीठ चाळून घ्या. त्यात आता मीठ मिक्स करा आणि थोडे पाणी मिसळून पीठ मळून घ्या.

• यानंतर, हे गव्हाचे पीठ सेट होण्यासाठी २० मिनिटे झाकून ठेवा.

• आता एका कढईमध्ये किंवा पॅनमध्ये २ चमचे तेल घाला. हे तेल गरम झाल्यावर त्यात जिरे व हिंग घालून परतून घ्या.

• आता या तेलात हळद, धनेपावडर आणि हिरवी मिरची घाला. त्यानंतर, मूग डाळीची पेस्ट, लाल तिखट, गरम मसाला आणि चवीनुसार मीठ घाला.

• आता हे मिश्रण मंद आचेवर परतून घ्या. हे मिश्रण चांगले भाजल्यानंतर थोडावेळ थंड करायला ठेवा. तुमचे पराठ्याचे सारण आता तयार आहे.

• त्यानंतर, गव्हाच्या पीठाचे बारीक गोळे करा आणि त्यात मूग डाळीचे सारण भरून ते हलक्या हाताने लाटून घ्या.

• दुसऱ्या बाजूला गॅसवर तवा किंवा पॅन गरम करायला ठेवा आणि त्यावर तूप किंवा तेल घालून पराठा दोन्ही बाजूंनी चांगला भाजून घ्या.

• हिरवी चटणी, टोमॅटो सॉस किंवा दह्यासोबत हे गरमागरम पराठे सर्व्ह करा.