Ragi Dosa Recipe : सकाळच्या नाश्त्यामध्ये हेल्दी आणि टेस्टी खाण्याची इच्छा सगळ्यांनाच असते. शिवाय, रोजचे तेच नाश्त्याचे पदार्थ खायला कंटाळा देखील येतो. त्यामुळे, पोहे, इडली, उपमा, शिरा यांना एक वेगळा पर्याय म्हणून तुम्ही नाचणीची निवड करू शकता. नाचणी हे धान्य ग्लुटेनमुक्त असून या नाचणीपासून तुम्ही वेगवेगळ्या प्रकारचे खाद्यपदार्थ बनवू शकता.

नाचणीपासून तुम्ही नाश्त्याला चविष्ट नाचणी डोसा बनवू शकता. नाचणीमध्ये कॅल्शिअम, प्रथिने, फायबर आणि इतर पोषकतत्वांचे भरपूर प्रमाण आढळते. त्यामुळे, नाचणीचे सेवन जरूर करावे.

नाचणीपासून विविध प्रकारचे खाद्यपदार्थ बनवले जातात. नाचणीपासून तुम्ही क्रिस्पी आणि चविष्ट असा डोसा देखील बनवू शकता. हा नाचणीचा डोसा बनवायला अतिशय सोपा आहे. नाश्त्यासाठी हा एक बेस्ट ऑप्शन आहे. चला तर मग जाणून घेऊयात नाचणीचा डोसा बनवण्याची सोपी रेसिपी.

नाचणीचा डोसा बनवण्यासाठी लागणारे साहित्य खालीलप्रमाणे :

• नाचणीचे पीठ १ वाटी

• रवा १ वाटी

• तांदळाचे पीठ १ वाटी

• दही अर्धा कप

• हिरव्या मिरच्या बारीक चिरलेल्या

• बारीक चिरलेले आले

• कोथिंबीर बारीक चिरलेली

• १ कांदा बारीक चिरलेला

• १ चमचा जिरे

• चवीनुसार मीठ

• तेल

• पाणी आवश्यकतेनुसार

नाचणीचा डोसा बनवण्याची योग्य पद्धत खालीलप्रमाणे :

• नाचणीचा डोसा बनवण्यासाठी सर्वात आधी एक मोठे बाऊल घ्या.

• या बाऊलमध्ये १ वाटी नाचणी, रवा आणि तांदळाचे पीठ चांगले मिसळून घ्या.

• त्यानंतर, यामध्ये दही, आले, हिरवी मिरची, कांदा, जिरे, कांदा आणि मीठ टाका.

• आता या पीठामध्ये आवश्यकतेनुसार पाणी घालून डोसा बॅटर बनवून घ्या.

• त्यानंतर हे पीठ १५-२० मिनिटांसाठी सेट करायला ठेवा.

• आता गॅसवर डोसा पॅन किंवा तवा गरम करायला ठेवा.

• त्यात थोडे तेल पसरून त्यावर नाचणी डोश्याचे पीठ पसरवा.

• आता दोन्ही बाजूंनी थोडे तेल घालून नाचणी डोसा सोनेरी होईपर्यंत भाजून घ्या.

• तुमचा चविष्ट आणि हेल्दी नाचणी डोसा तयार आहे.

• नारळाची चटणी किंवा बटाट्याच्या चटणीसोबत हा गरमागरम नाचणी डोसा सर्व्ह करा.