Christmas 2023 : ख्रिसमस अवघ्या काही दिवसांवर येऊन ठेपला आहे. त्यामुळे, सर्वत्र ख्रिसमसची लगबग पहायला मिळत आहे. सांताक्लॉझच्या टोप्या, बेल्स, ख्रिसमस ट्री आणि सजावटीच्या गोष्टींनी बाजारपेठा सजल्या आहेत.

ख्रिसमसनिमित्त विविध प्रकारचे केक्स, कुकीज, गोड पदार्थ आणि खाद्यपदार्थ बनवले जातात. या पदार्थांची नुसतीच रेलचेल पहायला मिळते. यंदाच्या ख्रिसमसला तुम्ही जर सोपा आणि स्वादिष्ट केक बनवायचा विचार करत असाल तर बिस्किटपासून केक नक्की बनवा.

हा केक बनवण्यासाठी तुम्हाला जास्त वेळ आणि जास्त साहित्याची गरज पडणार नाही. या केकची रेसिपी बनवायला एकदम सोपी आहे. चला तर मग जाणून घेऊयात या बिस्किट केकची रेसिपी.

बिस्किट केक बनवण्यासाठी लागणारे साहित्य खालीलप्रमाणे

• २ कप बिस्किटांचे तुकडे (तुमच्या आवडीचे कोणतेही बिस्किट घ्या. शक्यतो चॉकलेट फ्लेवरचे बिस्किट घ्यावे)

• १ कप दूध

• १०० ग्रॅम कोको पावडर

• २ चमचे कॉर्नफ्लोअर

• अक्रोड (मूठभर)

• बदाम ४ चमचे

• चॉकलेट चिप्स (मूठभर)

बिस्किट केक बनवण्याची योग्य पद्धत खालीलप्रमाणे

• सर्वात आधी बिस्किटांचे तुकडे मिक्सरला बारीक करून घ्या.

• हा बारीक झालेला चुरा एका बाऊलमध्ये काढून ठेवा.

• त्यानंतर, दुधामध्ये कोको पावडर घालून हे मिश्रण गरम करायला ठेवा.

• त्यानंतर, मिश्रण अधिक घट्ट बनवण्यासाठी त्यात कॉर्नफ्लोअर घाला.

• जोपर्यंत हे मिश्रण घट्ट होत नाही तोपर्यंत ते गरम करा.

• मिश्रण घट्ट झाल्यावर ते थंड होण्यासाठी काढून ठेवा.

• आता केक बनवण्याचे भांडे घ्या. त्यामध्ये, आता बिस्किटांचा चुरा घाला. त्यानंतर, कोको पावडरची बनवलेली घट्ट पेस्ट त्यामध्ये घाला.

• आता त्यावर पुन्हा बिस्किटांचा चुरा घाला आणि त्यावर पुन्हा कोको पावडरच्या पेस्ट घाला.

• हे लेअर्स लावून झाल्यनंतर त्यात आता सजावटीसाठी अक्रोड, बदाम आणि चॉकलेट चिप्स घाला.

• यावर तुम्ही तुमच्या आवडीचे चॉकलेट जेम्स, टूटीफ्रूटी देखील घालू शकता.

• साधारण ३० मिनिटांसाठी हा केक ओव्हनला डिप फ्रिझ करा.

• आता तुमचा स्वादिष्ट बिस्किट केक तयार आहे.