अनेक घरांमध्ये लोकांची आवड-निवड पाहून पदार्थ केले जातात. काहीवेळा एखादा पदार्थ छान झाला की तो पटकन संपतो. तर काही पदार्थ (Food) संपतही नाहीत. पिठलं (Pitla) हा असाच एक प्रकार. पिठलं भाकरी, पोळी, भाताबरोबर अनेक घरात आवडीने खाल्लं जातं. कांदा, लसूण मिरची घालून केलेल्या पिठल्याची चव अवर्णनीयच. पण तोंडी लावणं म्हणून ते कधी रात्री केलंत तर सर्व संपेलच असं नाही. कितीही आवडलं तरी परतद दुसऱ्या दिवशी ते खाल्लं जाईल, याचीही शाश्वती नसते. अशावेळी ते संपण्यासाठी एक गंमत करता येईल. त्याचं थालिपीठ करता येईल. ते कसं हे पाहूया.

साहित्य( Ingredients) - एक मोठी वाडगं पिठलं, ज्वारीचे पीठ ८ मोठे चमचे, तांदळाचे पीठ ५ मोठे चमचे, भरपूर कांदा, आवडीप्रमाणे तिखट, मीठ, तिळं, ओवा, हिंग, हळद आणि कोथिंबीर

कृती(Step)- वरील सर्व साहित्य एकत्र करा. थोडे थोडे पाणी घालून पीठ छान मळून घ्या. तेलाचा हात लावा. तयार झालेला गोळा १० मिनिंट बाजूला ठेवा. मग तव्यावर तुम्हाला जेवढ्या आकाराचे मोठे किंवा छोटे थालिपीठ हवे असेल तेवढे तव्यावर थापून घ्या. आजूबाजूला थोडे तेल सोडा. दोन्ही बाजूनी खरपूस भाजून झाल्यावर खायला तयार आहे थालिपीठ. लोणी, सॉस, दही याबरोबर तुम्ही हे थालिपीठ खाऊ शकता.

टीप- अनेक घरांमध्ये मुलांना थालिपीठ आवडतं. पण पीठलं आवडत नाही. अशावेळी जर तुम्ही अशाप्रकारे थालिपीठ करून दिलेत तर मुलेही ती आवडीने खातील. शिवाय पौष्टीक पदार्थही खाल्ला जाईल. त्यात कांदा आवडत नसेल तर तुम्ही कोबीही घालू शकता.